ბულგარეთის საგარეო საქმეთა სამინისტრო რუსეთში მყოფ საკუთარ მოქალაქეებს მოუწოდებს, შეძლებისდაგვარად, დატოვონ ქვეყნის ტერიტორია. იმ პირებს კი, რომლებიც ქვეყნის დატოვებას ვერ ახერხებენ, რეკომენდაციას აძლევენ, რომ თავი აარიდონ ხალხმრავალ თავშეყრის ადგილებს. ამავდროულად, გამოიჩინონ სიფხიზლე და ყურადღებით გაითვალისწინონ გარემოებები და სიტუაციის განვითარება.
უკრაინის ომთან და რუსეთის ფედერაციის ხელისუფლების მიერ პოლონეთის არამეგობრულ სახელმწიფოდ აღიარებასთან დაკავშირებით, რუსეთის ფედერაციაში მოგზაურობისგან თავის შეკავებას ურჩევს საკუთარ მოქალაქეებს პოლონეთის საგარეო უწყებაც.
“უსაფრთხოების სიტუაციის მკვეთრი გაუარესების, საზღვრების ჩაკეტვის, ან სხვა გაუთვალისწინებელი სიტუაციების შემთხვევაში, ევაკუაცია შეიძლება აღმოჩნდეს მნიშვნელოვნად რთული, ან, თუნდაც, შეუძლებელი.
პოლონეთის მოქალაქეებს, რომლებიც ცხოვრობენ რუსეთის ფედერაციის ტერიტორიაზე, ვურჩევთ დატოვონ რუსეთის ტერიტორია ხელმისაწვდომი კომერციული და კერძო საშუალებებით,” – ნათქვამია უწყების განცხადებაში.