„ზამთრის დადგომასთან ერთად, ხეების გადარგვა განახლდა, თუმცა ამ შემთხვევაშიც „ნაციონალურ მოძრაობასთან“ ასოცირებული მედიასაშუალებები ისევ დეზინფორმაციას ავრცელებენ“, – ამ საკითხზე „ქართუ ჯგუფის“ საზოგადოებასთან ურთიერთობის სამსახურის უფროსი გიორგი უძილაური „ახალ თაობასთან“ ინტერვიუში საუბრობს:
„რუსთავი 2“-ის ერთ-ერთი ჟურნალისტის მფლობელობაში არსებული სააგენტო „გურიის მოამბის“ სტატიის მიხედვით, თითქოსდა ბიძინა ივანიშვილს სურდა გურიის ერთ-ერთი სკოლის ეზოდან დენდროლოგიურ პარკში ჭადრის ხის გადარგვა. ამას წერენ იმ ადამიანზე, რომელმაც ასობით სკოლა ააშენა, გაარემონტა, აღჭურვა და თურმე ახლა ბავშვებს ხის წართმევას უპირებს. ითქვა ისიც, რომ ბიძინა ივანიშილმა ოზურგეთის ერთ-ერთ სოფელში 45 ათას დოლარად ბაობაბის ხე შეიძინა. როგორც ჩანს, „გურიის მოამბის“ ჟურნალისტისთვის იმდენად ნაკლებად მნიშვნელოვანი იყო საზოგადოებისთვის სიმართლის მიწოდება, იმასაც კი არ დაუკვირდა, რომ ბაობაბის ხე საქართველოში არ ხარობს. ცნობისთვის, იყო რელიქტური ხე „გინკგო ბილობა“, თუმცა დენდროპარკის წარმომადგენლებმა ეს ხე საინტერესოდ პარკისთვის არ ჩათვალეს.
„გურიის მოამბის“ ჟურნალისტი სწორედ იმიტომ ასახელებს ასეთ აბსურდულ ფასებს, რომ ეს პროცესი არ შედგეს. ეს დაინტერესება ჩანს ამ სააგენტოს მთელ სამარცხვინო პოლიტიკაში ხეების გადარგვის გაშუქების კუთხით. მსგავსი ფასები არსად თქმულა, მაგრამ ჟურნალისტი მიზანმიმართულად ასახელებს ამ ციფრებს და მოსახლეობა შეცდომაში შეჰყავს.
მართალია, შემოთავაზებაა ძალიან ბევრი და ბევრს უარს ვეუბნებით. მაგალითად, მაგნოლიაში, რომლის არჩევანიც ძალიან დიდია 2.000-ზე მეტი არ გადაგვიხდია, ერთ-ერთმა მოქალაქემ რეკორდული ფასი მოითხოვა. მან თავის ყანაში მდგომ ხეში ითხოვა 60.000! რასაკვირველია, მას მარტივად ეთქვა უარი. დენდროპარკში 50 ხის გადარგვას ვაპირებთ, მაშინ როცა 200-მდე ვარიანტია შემოტავაზებული. და როცა შემოთავაზებული ხის ფასის არარეალურობის გამო უარს იღებენ, მოგვიანებით ზოგიერთი აცნობიერებს და უკან ბრუნდება უფრო ადეკვატური შემოთავაზებით“, – აცხადებს გიორგი უძილაური.
წყარო: „ახალი თაობა“