უკრაინის მიმართ ბრალდებები ისმის კრემლიდან. რუსეთის პირველი დიპლომატი მიიჩნევს, რომ სწორედ ოფიციალური კიევია ის მხარე, რომელიც ბირთვული იარაღის გამოყენების რისკებს ზრდის. სერგეი ლავროვი ვოლოდიმირ ზელენსკის ადანაშაულებს, თითქოს უკრაინის პრეზიდენტი დასავლეთს რუსეთზე პრევენციული ბირთვული დარტყმის განხორციელებისკენ მოუწოდებს.
“ჩვენ არ შეგვიძლია გავჩუმდეთ კიევის რეჟიმის ქმედებების საპასუხოდ, რაც მიზნად ისახავს სხვადასხვა სახის მასობრივი განადგურების იარაღის გამოყენების რისკების შექმნას. ზელენსკიმ თავის დასავლელ ბატონებს რუსეთზე პრევენციული ბირთვული დარტყმისკენ მოუწოდა. ამ ადამიანმა დაადასტურა ის საფრთხეები, რომელიც კიევის რეჟიმისგან მოდის და რომლის გასანეიტრალებლადაც დაიწყო სპეციალური სამხედრო ოპერაცია,” – განაცხადა სერგეი ლავროვმა.
უკრაინის პრეზიდენტის თქმით, მოსკოვმა ბირთვული იარაღის გამოყენებისთვის საკუთარი მოქალაქეების შემზადება დაიწყო. ზელენსკი დასავლეთს გააქტიურებისა და პრევენციული ზომების მიღებისკენ მოუწოდებს, თუმცა აზუსტებს, რომ ეს არ გულისხმობს რუსეთის ტერიტორიაზე თავდასხმებს.