საქართველოს პარლამენტის თავმჯდომარის შალვა პაპუაშვილის განცხადებით, დეოლიგარქიზაციის შესახებ უკრაინულ კანონზე ვენეციის კომისიის დასკვნა სავარაუდოდ მალე გახდება ცნობილი.
რაც შეეხება დეოლიგარქიზაციის გარშემო საქართველოში მიმდინარე პროცესებს, პაპუაშვილი ამბობს, რომ ქართული იურიდიული თუ არაიურიდიული საზოგადოება დილემის წინაშე აღმოჩნდა, რადგან მათ საკითხის მიმართ ყალბი აღქმები ჩამოაყალიბეს.
პაპუაშვილის თქმით, სავარაუდოდ „საზოგადოებამ უკვე აღმოაჩინა ოლიგარქი, მაგრამ არა იმ მისამართზე, რომელზეც ოპოზიციის ნაწილი მოელოდა“.
„ვენეციის კომისიის დასკვნას რაც შეეხება, ზოგადად, მოგეხსენებათ, რომ ეს კანონი უკრაინაში მიღებულ იქნა 2021 წლის ნოემბერში, ამოქმედდა 2022 წლის მაისში და მიღებისთანავე, 2021 წლის ნოემბერში გაეგზავნა ვენეციის კომისიას დასკვნისთვის. თუმცა რუსეთის აგრესიული ომის გამო, უკრაინასთან მიმართებით ვენეციის კომისიის ყველა დასკვნა შეჩერებული იყო. როგორც ჩვენ ინფორმაცია გვაქვს, დაიძრა ეს და სხვა საკითხებიც, რომლებზეც უკრაინას ვენეციის კომისიისთვის მიმართული აქვს დასკვნების შედგენა და გამოქვეყნება. ამიტომ არის სიგნალები, რომ ეს დასკვნა სავარაუდოდ მალე იქნება.
თუმცა მეორე მხრივ, იმ შემთხვევაში, თუ იგივე პრაქტიკა გააგრძელა ვენეციის კომისიამ უკრაინასთან მიმართებით, რომ გადადოს ყველა დასკვნა მათთან დაკავშირებით, შეიძლება, ასე უსასრულოდ ვერ დაველოდოთ. ამიტომ მინდა, ერთ საკითხს გამოვეხმაურო, რაც შეეხება ვის უნდა ეწიოს ჩვენი ცოდვა. არ ვიცი, ევროკავშირს ეწევა თუ – არა, მაგრამ მგონი, პოლიტიკური სპექტრის ნაწილს უკვე ეწია ეს ცოდვა, რაც ოლიგარქიის საკითხსს შეეხება. ვინაიდან ეს ტერმინი შემოიღო, დაამკვიდრა ჩვენს ქვეყანაში ოპოზიციის და არასამთავრობო ორგანიზაციების ერთმა ნაწილმა და მთელი ბედის ირონიაც იმაშია, რომ როდესაც საქმე საქმეზე მიდგა, ვნახეთ, ეს ცოდვა საბოლოო ჯამში, ოპოზიციის ნაწილს თავად შემოუბრუნდა. ამიტომ ეს თავისთავად სასკოლო მაგალითია იმისა, როგორ ხდება ყალბი აღქმების ფორმირება, შემდეგ როგორ ახდენს გავლენას ყალბი აღქმები, მათ შორის საერთაშორისო აღქმებსა და რეპუტაციაზე, ჩვენი ქვეყნის რეპუტაციაზე. როდესაც საუბარია ოლიგარქიის და ასე შემდეგ საკითხებზე, მათ შორის ხელისუფლებასთან მიმართებით, საუბარია ჩვენი ქვეყნის რეპუტაციაზე. ამ ყალბი აღქმების შემდეგ როგორ ხდება უკან მობრუნება ასეთი რეკომენდაციებით და შემდეგ როგორ არის ხელის სავსავი, როგორ არის მთელი საზოგადოება, რა ვქნათ ახლა, რა ვუყოთ ამ ყველაფერს, როგორ გამოვიდეთ ამ მდგომარეობიდან.
მგონი, ეს არის კარგი სასკოლო მაგალითი, რომ როდესაც ხდება ყალბი აღქმების ჩამოყალიბება, მით უმეტეს საკუთარი ქვეყნის წინააღმდეგ, საბოლოო ჯამში, ამას კარგი შედეგი არ მოაქვს და სწორედ ამ დილემამდე მივყავართ, რა დილემაშიც ახლა აღმოჩნდა ქართული იურიდიული თუ არაიურიდიული საზოგადოება. გაფაციცებით ყველა ეძებს ოლიგარქს და მგონი, საზოგადოებამ უკვე აღმოაჩინა ზოგი ოლიგარქი, მაგრამ არა იმ მისამართზე, რომელზეც ამას ოპოზიციის გარკვეული ნაწილი მოელოდა“, – განაცხადა შალვა პაპუაშვილმა.