უკრაინის უსაფრთხოების სამსახურმა დონეცკის ოლქის ერთ-ერთ ყველაზე დიდ სალოცავთან, რუსი ოკუპანტების მიერ მოწყობილი საწამებელი ოთახი აღმოაჩინა. ინფორმაციას ამის შესახებ უსაფრთხოების სამსახური ავრცელებს.
უსაფრთხოების სამსახურის ცნობით, უწყების თანამშრომლებმა დონეცკის ოლქში, უკრაინის მიერ გათავისუფლებულ სვიატოჰირსკში, უკანონო დაკავების ადგილი აღმოაჩინეს. საწამებელი ოთახი, სვიატოჰირსკის ლავრასთან ახლოს მდებარე პანსიონატში იყო განთავსებული.
უწყების განცხადებით, რუსი ოკუპანტებს პანსიონატის შენობაში იძულებით გადაჰყავდათ ადგილობრივი მაცხოვრებლები, რომლებიც უკრაინის ტერიტორიულ მთლიანობას უჭერდნენ მხარს.
შემოწმების დროს გამომძიებლებმა აღმოაჩინეს საგნები, რომლებიც პირდაპირ მიუთითებენ წამების ნიშნებზე. ამჟამად ისევ მიმდინარეობს საგამოძიებო და ოპერატიული ღონისძიებები.
ამჟამად, უშიშროების სამსახურის გამომძიებლები ადგენენ მსხვერპლთა რაოდენობას და ვინაობას, ასევე წამებაში მონაწილე ოკუპანტების ვინაობას.