შვეიცარიული ბანკი „კრედიტ სუისი“ დათანხმდა, გადაიხადოს 495 მილიონი დოლარი აშშ-ში თავის წინააღმდეგ აღძრული საქმის დასარეგულირებლად. როგორც სააგენტო „როიტერი“ წერს, ეს არის ბოლო ანაზღაურება, რომელიც უკავშირდება წარსულში დაშვებულ შეცდომებს, რომლებმაც შელახეს შვეიცარიული ბანკის რეპუტაცია.
„კრედიტ სუისმა“ განაცხადა, რომ გადაიხდის კომპენსაციას ნიუ-ჯერსის გენერალური პროკურატურის მიერ აღძრული საქმის დასარეგულირებლად, რომელიც 2008 წლამდე ბანკის იპოთეკური ობლიგაციების ბიზნესს უკავშირდება.
გენერალური პროკურატურის მტკიცებით, ბანკმა ინვესტორები შეცდომაში შეიყვანა და იპოთეკური ობლიგაციების შეთავაზებისას და გაყიდვებისას დაკავებული იყო თაღლითობით ან სიცრუით. 2013 წელს აღძრული საქმის ფარგლებში პროკურატურა შვეიცარიული ბანკისგან ზარალის ასანაზღაურებლად სამ მილიარდ დოლარზე მეტს ითხოვდა.
ბანკში აცხადებენ, რომ შეთანხმების მიღწევის გამო მოხარულნი არიან.
„დარეგულირება, რომლისთვის „კრედიტ სუისს“ სახსრები დარეზერვებული აქვს, არის კიდევ ერთი ნაბიჯი ბანკის ძალისხმევაში, აქტიურად დაარეგულიროს სასამართლო და მემკვიდრეობითი საკითხები“, – ნათქვამია ბანკის განცხადებაში.
„კრედიტ სუისის“ თავმჯდომარემ, აქსელ ლემანმა გასულ კვირას ბანკის რეფორმირების პირობა დადო „საშინელი“ 2021 წლის შემდეგ, როდესაც ბანმა მილიარდობით დოლარი დაკარგა.
შვეიცარიის სიდიდით მეორე ბანკი ცდილობს, აღდგეს სკანდალების სერიის შემდეგ, რომელთა შორისაა გასულ კვირას საინვესტიციო კომპანიის Archegos-ის დაშლის შემდეგ ხუთი მილიარდი დოლარის დაკარგვა. ბანკს მოუწია კაპიტალის გაზრდა, აქციების გამოსყიდვის შეწყვეტა და დივიდენდების შემცირება, თუმცა აღდგენის ძალისხმევა შეაფერხა სამართლებრივი სკანდალების სერიამ.
ივნისში ბანკი დამნაშავედ ცნეს იმაში, რომ თავიდან ვერ აღკვეთა ბულგარული ნარკოკარტელის მიერ ფულის გათეთრება. მარტში კი ბერმუდის სასამართლომ დაადგინა, რომ „კრედიტ სუისის“ სიცოცხლის დაზღვევის განყოფილების მიერ მიყენებული ზარალის გამო საქართველოს ყოფილ პრემიერ-მინისტრს ბიძინა ივანიშვილს და მის ოჯახს ნახევარ მილიარდ დოლარზე მეტის ოდენობის კომპენსაცია უნდა გადაუხადოს.
შვეიცარიული ბანკის წინააღმდეგ აშშ-ში კიდევ სხვა საქმის გამოძიება მიმდინარეობს, რომლის ფარგლებშიც ბანკი ეჭვმიტანილია კლიენტების ხელშეწყობაში, დაემალათ აქტივები ხელისუფლებისგან.