ვხედავთ, ოპოზიციის ერთი ნაწილი როგორ ცდილობს, ჩაშალოს ევროპული ინტეგრაციის პროცესი, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
მისი თქმით, პირდაპირ ხდება ტორბედირება იმ პროცესის, რომელიც გულისხმობს კანდიდატის სტატუსის მიღებას.
პაპუაშვილის განცხადებით, ქართველი ხალხი შესაბამის პასუხს გასცემს მათ, ვინც ჩამორჩება საქართველოს ევროპული მომავლის მატარებელს.
„ამას ვხედავთ, როგორც პირდაპირ განცხადებებში, ასევე მათ დამოკიდებულებაში ამ საქმის მიმართ. ამაზე რაიმე კომენტარის გაკეთება რთულია, ჩვენ ჩვენი პასუხისმგებლობა გვაქვს და ასე ვმოქმედებთ. თავისთავად, ხელისუფლებაა პასუხისმგებელი, რომ რეკომენდაციები შესრულდეს. ამას კეთილსინდისიერად ვაკეთებთ. ვინც ჩამორჩება საქართველოს ევროპული მომავლის მატარებელს, იმას ქართველი ხალხი შესაბამის პასუხს გასცემს. ეს ხდებოდა ყოველ ჯერზე და ახლა სხვა პასუხი არ იქნება. ზუსტად იმას მიიღებენ, რასაც აქამდე იღებდნენ.
როცა ისინი ეწინააღმდეგებიან ქართველი ხალხის ნებას, ვგულისხმობ რადიკალურ ოპოზიციას, ისინი იღებენ ქართველი ხალხის სათანადო ნეგატიურ პასუხს და ეს კიდევ ერთხელ განმეორდება. საქმე იმაშია, რომ სამწუხაროდ, ოპოზიციის ეს ნაწილი ვერ სწავლობს იმ გაკვეთილებზე, რომელიც უკვე 2012 წლიდან მოყოლებული უკვე ცხრაჯერ საკუთარ თავზე იწვნიეს“, – განაცხადა შალვა პაპუაშვილმა.