რუსეთის თავდაცვის სამინისტროს ოფიციალურმა წარმომადგენელმა იგორ კონაშენკოვმა ბრიფინგზე თქვა,რომ ხერსონიდან დნეპრის მარცხენა სანაპიროზე უკან დახევისას 30 000-ზე მეტი რუსი სამხედრო მოსამსახურე გაიყვანეს, ასევე, დაახლოებით 5 000 ცალი იარაღი და სამხედრო ტექნიკა, ასევე მატერიალური ქონება გაიტანეს.
მან კიდევ ერთხელ აღნიშნა, რომ ოპერაცია მოსკოვის დროით პარასკევს დილის ხუთ საათზე დასრულდა.
„ყველა რუსული სამხედრო ტექნიკა, რომელიც შესაკეთებელი იყო, ამოღებულია და სარემონტო განყოფილებებმა ახლა დაიწყეს შეკეთება. არც ერთი ტექნიკა და იარაღი არ დარჩა, ყველა რუსი სამხედრო მოსამსახურე მარცხენა სანაპიროზე გადაიყვანეს“, – თქვა კონაშენკოვმა.
მისივე თქმით, სამხედროების გაყვანის დროს მსხვერპლი არ ყოფილა.
გუშინ უკრაინის თავდაცვის მინისტრმა, ოლექსი რეზნიკოვმა Reuters-თან ინტერვიუში თქვა, რომ რუსეთის დაჯგუფების რაოდენობა ხერსონის რეგიონში 40 000 ჯარისკაცამდე იყო.