უკან დახევის შემდეგ დარტყმა მშვიდობიან მოსახლეობაზე – მას შემდეგ, რაც ხერსონი უკრაინელებმა დაიკავეს, რუსეთის არმია ოლქის სოფლებს ბომბავს – არის მსხვერპლი, არიან დაშავებულებიც. მიზანში, დასახლებულ ზონებთან ერთად, სტრატეგიული სამოქალაქო ობიექტებიც ამოიღეს. ხერსონი კვლავ ყურადღების ცენტრშია. გარდა ამისა, მძიმე ბრძოლების მიმდინარეობს ფრონტის ხაზზე უკრაინის აღმოსავლეთ ნაწილში.
უკრაინის პრეზიდენტის, ვოლოდიმირ ზელენსკის თქმით, დონეცკის მტკიცე დაცვით უკრაინას შეუძლია სხვა მიმართულებებზე შეტევითი ოპერაციები აწარმოოს.
“უკრაინის თავდაცვის ძალებმა კონტროლი დაამყარეს ხერსონის ოლქის 60-ზე მეტ დასახლებულ პუნქტზე. პოლიციამ დაიწყო ვითარების დასტაბილურება. ოკუპანტებმა, ხერსონიდან გაქცევამდე, გაანადგურეს მთელი ინფრასტრუქტურა – კავშირგაბმულობა, წყალმომარაგება, გათბობა, ელექტროენერგია. რუსებს ყველგან ერთი მიზანი აქვთ – ხალხის დაცინვა, მაგრამ ჩვენ ამ ყველაფერს აღვადგენთ. მადლობა ჩვენს დამცველებს ხერსონში. ყველას, ვინც უკრაინისთვის იბრძვის, ვინც მუშაობს ჩვენი გამარჯვებისთვის, ვინც ყველა დონეზე გვეხმარება. ეს სიტყვები განსაკუთრებით ეკუთვნით მათ, ვინც უძლებს რუსეთის შეტევებს დონეცკის ოლქში. იქ სრული ჯოჯოხეთია. ძალიან ხისტი ბრძოლები მიმდინარეობს.
ჩვენი ქვედანაყოფები მამაცურად იცავენ თავს, უძლებენ ოკუპანტების საშინელ ზეწოლას, ინარჩუნებენ ჩვენ თავდაცვის ზღუდეებს. დონეცკის მტკიცე თავდაცვით, ჩვენ შეგვიძლია შეტევითი ოპერაციები ჩავატაროთ სხვა მიმართულებებით. მადლობა, მადლობა ყველას ხერსონის განთავისუფლების დავალების ბრწყინვალე შესრულებისთვის! ასე იქნება ხერსონის ოლქში მდებარე გენიჩესკშიც, მელიტოპოლშიც. მოვალთ ყველა ჩვენს ქალაქსა და სოფელში, დონბასშიც. აუცილებლად ვნახავთ, თუ როგორ შეხვდებიან დროშებით ხელში უკრაინულ ძალებს ყირიმში,” – ამბობს ზელენსკი.
უკრაინის შეიარაღებული ძალების გენერალური შტაბის პრესსპიკერი, ოლექსანდრ სტუპუნი აცხადებს, რომ საოკუპაციო ძალები მდინარე დნეპრის მარცხენა სანაპიროზე გამაგრებას განაგრძობენ.
“გასული დღის განმავლობაში უკრაინის თავდაცვის ძალების ნაწილებმა მოიგერიეს ოკუპანტების თავდასხმები ლუჰანსკის ოლქებში. ხერსონის გათავისუფლებულ ტერიტორიებზე უსაფრთხოების ზომების მიღება გრძელდება. მტერი განაგრძობს დნეპრის მარცხენა სანაპიროზე გამაგრებას. განახლებული ინფორმაციით, დადასტურდა, რომ თავდაცვის ძალებმა ხერსონის რეგიონში ოკუპანტების საკონცენტრაციო ბაზაზე იერიშები მიიტანეს. დნიპრიანის დასახლების მიდამოში მაღალი სიზუსტით დარტყმა განხორციელდა შენობაზე. შედეგად, დაღუპული დამპყრობლების ორი სატვირთო მანქანა ტავრისკში გადაიყვანეს. 56 მძიმედ დაშავებული კი საავადმყოფოში გადაიყვანეს, მათგან 16 მალევე გარდაიცვალა. უკრაინის თავდაცვის ძალების ავიაციამ მტერს 13 დარტყმა მიაყენა. დაზიანდა პერსონალის, იარაღისა და სამხედრო ტექნიკის კონცენტრაციის 8 უბანი, ასევე მოწინააღმდეგის საზენიტო-სარაკეტო სისტემების 5 პოზიცია,” – თქვა სტუპუნმა.