მიმდინარე კვირაში საზოგადოების ინტერესის საგანი ე.წ. ქოლცენტრების საქმე კიდევ ერთხელ გახდა.
ქოლცენტრების ტრანსნაციონალური თაღლითური სქემის ერთ-ერთი მთავარი ფიგურანტი სწორედ თავდაცვის ყოფილი მინისტრი დავით კეზერაშვილია. „იმედის კვირამ“ ათეულობით დოკუმენტი, საერთაშორისო სტატია თუ საქმე მოიძია, რომელიც მსჯავრდადებულ, ბრალდებული და ძებნილ კეზერაშვილს უკავშირდებოდა.
ირკვევა, რომ „აქსის თაუერსის“ ოცდამეთექვსმეტე და ოცდამეჩვიდმეტე სართულზე, სადაც ქართველმა და გერმანელმა სამართალდამცავებმა სპეცოპერაცია ჩაატარეს, საერთაშორისო დანაშაულში ჩართული 2 ქოლცენტრი მუშაობდა. ამ კედლებიდან, საერთაშორისო ზარებით პენსიონერებს დანაზოგს ფიქტიური ვებ-პლატფორმების ანგარიშებზე მოტყუებით არიცხვინებდნენ. კომპანია „იუსიჯი აგროს“ ოფისიდან, რომლის 90%-იან წილსაც ძებნილი დავით კეზერაშვილის მამა ფლობს, რთული თაღლითური სქემით კლიენტების მოზიდვა-შენარჩუნების პროცესში რიგითი თანამშრომლები, მენეჯერები და ტოპ მენეჯერები იყვნენ ჩართული.
კეზერაშვილის მარჯვენა ხელი და კომპანია „იუსიჯი აგროს“ დირექტორი, იოსებ მგელაძე კი ახლა ცდილობს დაამტკიცოს, რომ მის საკუთრებაში არსებულ ქოლცენტრებს ის მხოლოდ აქირავებდა. საერთაშორისო თაღლითური სქემის გაშიფვრაში და შემდეგ მასშტაბურ სპეცოპერაციებში 300 ქართველი და 60 გერმანელი სპეციალისტი იყო ჩართული.
საუკუნის აფერას შეწირულ პენსიონერთა დანაზოგების შესახებ უკვე დიდი ხანია მსოფლიო პრესა წერს, მზადდება ჟურნალისტურ გამოძიებები, რომელზეც 21 ქვეყნის ათობით ჟურნალისტი მუშაობდა. მათ მოიპოვეს თაღლითობის მსხვერპლთა სიებიც. ათასობით დაზარალებულით და ასეულობით მილიონობით დოლარის, ევროსა თუ ფუნტის დანაკარგით – საუკუნის საერთაშორისო თაღლითობის კვალი ამ ჟურნალისტური გამოძიებებით კეზერაშვილამდე მიდის.
დეტალები ნახეთ „იმდის კვირის“ სპეცრეპორტაჟში.