„ნაციონალურ მოძრაობაში“ შიდა არჩევნებისთვის ემზადებიან. როდის და რა ფორმით აირჩევენ პარტიის ახალ თავმჯდომარეს, ჯერ უცნობია. პარტიული თანამდებობისთვის იბრძოლებენ ნიკა მელია, გიორგი ჩალაძე და გიორგი მუმლაძე. ამ დრომდე უცნობია, ვის დაუჭრეს მხარს „ნაციონალური მოძრაობის“ ის ჯგუფი, რომელმაც ნიკა მელია გააკრიტიკა და არჩევნების დანიშვნა მოითხოვა.
„ჩვენი ამოცანაა ამ პროცესმა არ დაკარგოს სოლიდურობა. ყველაფერ იქნება გათვალისწინებული იმისთვის, რომ პარტიამ ცივილური წესით აირჩიოს ძალიან ღირსეული თავმჯდომარე“, – აცხადებს ბაჩო დოლიძე.
ლევან ბეჟაშვილი კი პროცესის ტექნიკურ მხარეზე აკეთებს აქცენტს.
„ყველაზე რთული და მნიშვნელოვანი არის ელექტრონული არჩევნების განხორციელების კვალდაკვალ როგორ მოხდება შენი ამომრჩევლის, პარტიის მხარდამჭერის, პარტიის წევრის გაფილტვრა, იდენტიფიცირება, რათა სხვა პარტიების წევრებს, არაკეთილმოსურნეებს არ ჰქონდეთ საშუალება არჩევნებში მონაწილეობა მიიღონ“, – მიიჩნევს ბეჟაშვილი.