ფრაქცია „ქართული ოცნების“ თავმჯდომარის მამუკა მდინარაძის განცხადებით, ოპოზიციის წარმომადგენლებთან კონსულტაციებამდე სახალხო დამცველობის კონკრეტული კანდიდატების მხარდაჭერაზე არ ისაუბრებენ. მისივე თქმით, საკითხზე კონსულტაციები ხვალიდან დაიწყება.
„კონსულტაციებს დავიწყებ ხვალიდანვე, რამდენი ხანი, რამდენი დღეც დაგვჭირდება. ჯერ მათ ინიციატივა არ გამოუჩენიათ, რომელიმე კანდიდატზე საუბარი არ დაუწყიათ. ჩვენც კონკრეტულ კანდიდატებზე არ ვისაუბრებთ, ჯერ მათ მოვუსმენთ, ვისზე უშვებენ შანსს, რომ მხარი დაუჭირონ, ჩვენ არც ერთი კანდიდატის მიმართ სიმპათიასაც კი არ გამოვხატავთ. დავიწყებთ ფიქრს და მსჯელობას მათთან ერთად. ჩვენ არ დავაყენეთ კანდიდატურა და ახლაც შევეცდებით, რომ მათგან წამოვიდეს ინიციატივა. ჩვენ რომ დღეს ვინმეს მხარდაჭერა გამოვუცხადოთ, დარწმუნებული ვარ, იმის გამო, რომ ჩვენ გამოვუცხადეთ მხარდაჭერა, მხარს არ დაუჭერენ. ამიტომ თავად დააფიქსირონ თავიანთი პოზიცია“, – განაცხადა მამუკა მდინარაძემ.