სააკაშვილსა და გვარამიაზე კომისარს ერთი სიტყვაც არ დაუძრავს, – ასე უპასუხა პარლამენტის თავმჯდომარემ, შალვა პაპუაშვილმა ჟურნალისტის კითხვას, განიხილეს თუ არა ოლივერ ვარჰეისთან შეხვედრაზე დეოლიგარქიზაციისა და გვარამია-სააკაშვილის საკითხები.
„ნიკა გვარამიასა და მიხეილ სააკაშვილის საკითხი მხოლოდ „ნაციონალური მოძრაობის“ წარმომადგენელმა ახსენა. კომისარს ერთი სიტყვაც არ დაუძრავს ამ საკითხებთან დაკავშირებით
„კანონის უზენაესობა ვერ იქნება წინაღობა ევროკავშირის წევრობისთვის, პირიქით, კანონის უზენაესობა არის წინაპირობა იმისთვის, რომ მიგვიღონ ევროკავშირში. აღარ გავიმეორებ იმას, თუ რისთვის იხდის სააკაშვილი სასჯელს. მგონი ამ ქვეყანაში არ არსებობს ადამიანი, ვისაც ეჭვი ეპარება, რომ მას ეს დანაშაულები ჩადენილი აქვს და ის რომ ეს ასეა, დადასტურდა არა მხოლოდ საქართველოში, არამედ სტრასბურგის სასამართლომ პირდაპირ ხელი დაადო მიხეილ სააკაშვილს. ამაზე უკვე თვითონაც აღარ საუბრობენ, ხვდებიან, რომ მისი უდანაშაულობის შესახებ არგუმენტები აღარ აქვთ. კანონის უზენაესობა რომ უნდა იყოს დაცული ამ ქვეყანაში და ყველა დანაშაული უნდა იყოს დასჯილი, ამას ქართული სახელმწიფო ვერ გადავა“, – განაცხადა შალვა პაპუაშვილმა.