თეთრ სახლში განაცხადეს, რომ აშშ-ის პრეზიდენტი, ჯო ბაიდენი პოლონელ კოლეგასთან, ანდჟეი დუდასთან სატელეფონო საუბარს გამართავს.
მანამდე სააგენტო Associated Press-მა ინფორმაცია გაავრცელა, რომ პოლონეთის ტერიტორიაზე, უკრაინის საზღვართან რუსული რაკეტა ჩამოვარდა, რომლის აფეთქებასაც ორი ადამიანი ემსხვერპლა.
აშშ-ის თავდაცვის დეპარტამენტში განაცხადეს, რომ რუსული რაკეტების პოლონეთის ტერიტორიაზე ჩამოვარდნის შესახებ ინფორმაციას ვერ ადასტურებენ.
პოლონეთის ტერიტორიაზე მომხდარი აფეთქების შემდეგ, პოლონეთის მთავრობამ საბრძოლო მზადყოფნის ამაღლება გადაწყვიტა.
„დღეს მოხდა აფეთქება, რომელსაც ორი ადამიანის სიცოცხლე ემსხვერპლა, სპეციალური სამსახურები ადგილზე მუშაობენ. პროცედურები დასრულებულია, მიღებულია გადაწყვეტილება ჩვენს ქვეყანაში დანაყოფების საბრძოლო მზადყოფნის ამაღლების შესახებ“, – განაცხადა პოლონეთის მთავრობის სპიკერმა, პიოტრ მიულერმა.
მისი თქმით, პოლონეთის მთავრობა სწავლობს, არის თუ არა ჩრდილოატლანტიკური ხელშეკრულების მე-4 მუხლით გათვალისწინებული პროცედურების დაწყების საფუძველი. აღნიშნული მუხლი ამბობს, რომ მხარეები გამართავენ ერთობლივ კონსულტაციებს, როდესაც რომელიმე მხარის აზრით, საფრთხე ემუქრება რომელიმე მხარის ტერიტორიულ მთლიანობას, პოლიტიკურ დამოუკიდებლობას ან უსაფრთხოებას.
მიულერმა ასევე განაცხადა, რომ პოლონეთის მთავრობა გაავრცელებს შეტყობინებას ინციდენტის შესახებ, რომელიც იქნება არსებითად მკაფიო, რათა არ იყოს მცდარი ინფორმაცია.