„ნაციონალური მოძრაობის“ მხარდამჭერები და ამომრჩევლები შეარჩევენ თავმჯდომარეს, რომელმაც უნდა გადაჭრას პარტიის წინაშე მდგომი ამოცანები და გამოწვევები, რომლებიც მას დღეს აქვს, – ამის შესახებ „ნაციონალური მოძრაობის“ წევრმა დავით კირკიტაძემ განაცხადა.
„იყო გაურკვევლობა და ყველა გაურკვევლობის დროს საუკეთესო გამოსავალია არჩევნები. სწორედ ამ პროცესში ვართ ახლა. რაც შეეხება ლევან ხაბეიშვილის შანსებს, მე ღრმად დარწმუნებული ვარ, რომ მას აქვს უდიდესი შანსი, გახდეს „ნაციონალური მოძრაობის“ არჩეული თავმჯდომარე“, – განაცხადა კირკიტაძემ.
„ნაციონალური მოძრაობის“ პარტიის თავმჯდომარეობისთვის სამი კანდიდატი იბრძოლებს – ლევან ხაბეიშვილი, ნიკა მელია და გიორგი მუმლაძე, თუმცა არ არის გამორიცხული საკუთარი კანდიდატურა ხატია დეკანოიძემაც დააყენოს. ამ გადაწყვეტილების შესახებ დეკანოიძე სავარაუდოდ, რამდენიმე დღეში, ბრიუსელიდან დაბრუნების შემდეგ ისაუბრებს. შიდაპარტიული არჩევნები „ნაციონალურ მოძრაობაში“ დაახლოებით, სამ კვირაში ჩატარდება. როგორც მელიას, ისე ხაბეიშვილის მხარდამჭერები ამბობენ, რომ არჩევნები, მიუხედავად შედეგისა, პარტიის ორად გაყოფის მიზეზი არ გახდება. „ქართულ ოცნებაში“ კი აცხადებენ, რომ „ნაციონალურ მოძრაობაში“ ახლა კლანებს შორის ძალაუფლების გადანაწილების პროცესი მიმდინარეობს.