ვინც მოიპოვებს შემდეგ ეტაპზე ამ პარტიის ხელმძღვანელობას, იქნება მხოლოდ და მხოლოდ მიხეილ სააკაშვილისა და ნიკანორ მელიას უბრალო კლონი, – ამის შესახებ საპარლამენტო უმრავლესობის წევრმა, გიორგი ხელაშვილმა „ქრონიკაში“ განაცხადა.
„ის, რაც „ნაციონალურ მოძრაობაში“ ხდება, რა თქმა უნდა, ყველასთვის დამაბნეველია, პირველ რიგში თავად პარტიის წევრებისთვის. ჩვენ ვიცით, რომ ეს პარტია ცდილობდა ხელისუფლება ჩაეგდო ხელში და ამისათვის მათ ყველა ფსონი დადეს ხელისუფლების ხელში ჩაგდების არადემოკრატიულ მეთოდებზე, ეს იყო ქუჩის აქციები, საბოტაჟი, არეულობა, მტრობის, შუღლის დათესვა. კანონია საზოგადოებრივი, რომ თუკი მიზანს მოკლე ვადაში ვერ აღწევ, მაშინ თვითონ იწყებ რღვევას, ვინაიდან რესურსი აღარ გაგაჩნია და სწორედ ასე დაიწყო არეულობა „ნაციონალურ მოძრაობაში“. რაც შეეხება ამ არეულობის შედეგებს, მე არ მოველი, რომ საქართველოსთვის რაიმე გაუმჯობესდება. სამწუხაროდ, ის, ვინც მოიპოვებს შემდეგ ეტაპზე ამ პარტიის ხელმძღვანელობას, იქნება მხოლოდ და მხოლოდ მიხეილ სააკაშვილისა და ნიკანორ მელიას უბრალო კლონი. შეუძლებელია, რომ ამ არეულობიდან ქვეყნისთვის რაიმე კარგი გამოვიდეს. ვფიქრობ, რომ შემდეგი იქნება უფრო რადიკალური და მართალია, მათ ჰგონიათ, რომ ინტელექტუალურ სამჭედლოს წარმოადგენენ, მაგრამ ძალიან სამწუხაროდ, ვხედავთ, რომ „ნაციონალური მოძრაობის“ ისედაც არც თუ მთლად მდიდარი ინტელექტუალური რესურსი უფრო და უფრო შეუქცევადად იწურება“,– აღნიშნა ხელაშვილმა.