პირის მიერ თუ სასჯელის მოხდა შეუსაბამოა ჯანმრთელობის მდგომარეობის გამო, მაშინ სასამართლო მიიღებს გადაწყვეტილებას, გადაავადოს თუ არა სასჯელი, გადაწყვეტილების მიღებისას სასამართლო დამოუკიდებელია და დაე, ნურავინ, მათ შორის საქართველოს პრეზიდენტი, ნუ განიზრახავს, რაიმე ტიპის გადაწყვეტილების მიღებისკენ მოუწოდოს მოსამართლეს, – ამის შესახებ საქართველოს კულტურის, სპორტისა და ახალგაზრდობის მინისტრმა, თეა წულუკიანმა განაცხადა. მისი თქმით, მოსამართლე იცნობს საქმის მასალებს, ამიტომ მას შეუძლია ყველაზე კარგი გადაწყვეტილების მიღება.
„ყურადღებით მოვისმინეთ საქართველოს პრეზიდენტის განცხადება. რასაკვირველია, საინტერესოა, რას ფიქრობს ის, რადგან მოგეხსენებათ, შეწყალების კომპეტენცია მხოლოდ მას აქვს. ეს არის მისი სრული დისკრეცია და ვიცით, რომ მისი პოზიცია, სააკაშვილის შეწყალებასთან დაკავშირებით, მკვეთრად უარყოფითი იყო ხოლმე. ძალიან დიდი იმედი მაქვს, მისი ეს პოზიცია არ შეცვლილა. გასაგები შეიძლება იყოს ის, რომ ამ პოზიციას შეიძლება, ღიად ვეღარ უჭერდეს მხარს, თუმცა მე როგორც ერთ მოქალაქეს, მაინტერესებს, უფრო მკაფიოდ მოვისმინო, ხომ არ შეცვლილა რაიმე მისი მხრიდან და თუ შეიცვალა, ან შეიცვლება, რატომ, ვინაიდან დასაბუთება აუცილებელია, როდესაც თანამდებობის პირი დისკრეციის ფარგლებში იღებს რაიმე ტიპის გადაწყვეტილებას, მაგრამ იმედს გამოვთქვამ, მისი უარყოფითი პოზიცია სააკაშვილის შეწყალებასთან დაკავშირებით არ შეცვლილა.
რაც შეეხება სასამართლოს, ვისაც გჯერათ, დაიჯერეთ, რომ სასამართლო ამ ქვეყანაში არის თავისუფალი. სასამართლო შეწყალებაზე არ მსჯელობს. პირის მიერ თუ სასჯელის მოხდა შეუსაბამოა ჯანმრთელობის მდგომარეობის გამო, მაშინ სასამართლო მიიღებს გადაწყვეტილებას, გადაავადოს თუ არა სასჯელი. ამ გადაწყვეტილების მიღებისას სასამართლო დამოუკიდებელია და დაე, ნურავინ, მათ შორის საქართველოს პრეზიდენტი ნუ განიზრახავს, რაიმე ტიპის გადაწყვეტილების მიღებისკენ მოუწოდოს მოსამართლეს, რადგან მოსამართლემ ყველაზე კარგად იცის, რა გადაწყვეტილება მიიღოს, ერთი მიზეზის გამო, მას წინ უდევს დოკუმენტები, რომლებიც ჩვენ არავის გვიდევს წინ. ამიტომ მოსამართლე, საქმის მასალებიდან გამომდინარე, ყველაზე კარგ გადაწყვეტილებას მიიღებს, ან არ გადაავადებს, ან გადაავადებს, მაგრამ ეს არის მოსამართლისა და დაცვის მხარის ურთიერთობის თემა და ეს არ არის საქართველოს პრეზიდენტის კომპეტენცია, ოღონდ სალაპარაკო ენაზე – საქმე“, – განაცხადა თეა წულუკიანმა.