კანადის მთავრობა რუსი ოლიგარქის, რომან აბრამოვიჩის სანქციებით ჩამორთმეული 26 მლნ დოლარის აქტივების კონფისკაციას და მიღებული თანხების უკრაინის რეკონსტრუქციის დასახმარებლად გამოყენებას გეგმავს, – ინფორმაციას კანადის საგარეო საქმეთა სამინისტრო ავრცელებს.
უწყების ცნობით, კანადა Granite Capital Holdings-ის აქტივების დაკავებას და შემდგომ კონფისკაციის პროცედურას იწყებს. აღნიშნული კომპანია ოტავას სანქციების ქვეშ მყოფ რუს ბიზნესმენს რომან აბრამოვიჩს ეკუთვნის.
“კონფისკაციის შემთხვევაში, მიღებული თანხები შეიძლება გამოყენებულ იქნას უკრაინის აღდგენისა და პუტინის რეჟიმის უკანონო და გაუმართლებელი შემოჭრის შედეგად დაზარალებულთა კომპენსაციისთვის… კანადა არის G7-ის პირველი ქვეყანა, რომელმაც ასეთი ზომები დანერგა, რაც აჩვენებს თავის მტკიცე ერთგულებას უკრაინის, მისი რეკონსტრუქციისა და მართლმსაჯულების წინაშე, ვინც სარგებლობდა და მხარს უჭერდა პრეზიდენტ პუტინის რეჟიმს”, – წერს კანადის საგარეო საქმეთა სამინისტრო.
გარდა ამისა, კანადის საგარეო საქმეთა ხელმძღვანელმა მელანი ჯოლიმ ხაზგასმით აღნიშნა, რომ “კანადა გააგრძელებს ზეწოლას რუსეთის რეჟიმზე და მათზე, ვინც ისარგებლა პუტინის ბარბაროსული შეჭრით უკრაინაში”.
კანადის ფინანსთა მინისტრმა კრისტიან ფრილენდმა აღნიშნა, რომ რუსი ოლიგარქები, რომლებიც მონაწილეობდნენ უკრაინაში შეჭრაში, “ვერ იპოვიან უსაფრთხო თავშესაფარს კანადაში თავიანთი უკანონოდ შეძენილი კაპიტალისთვის”.
ცნობისთვის, კანადამ უკრაინაში, რუსეთის მიერ სრულმაშტაბიანი ომის დაწყებიდან, 1500-ზე მეტ ფიზიკურ და იურიდიულ პირს სანქციები დაუწესა.