ჩემი აზრით, საბოლოო ჯამში სალომე ზურაბიშვილი ანგარიშს გაუწევს იმ ხალხსაც, ვისთვისაც სააკაშვილის შეწყალება ძალიან მტკივნეული იქნებოდა, – ამის შესახებ „ქრონიკის“ ეთერში პარლამენტის ვიცე-სპიკერმა, „მოქალაქეების“ წევრმა, ლევან იოსელიანმა განაცხადა.
მისივე თქმით, პრეზიდენტმა რომც შეიწყალოს, ეს ვერ იქნება მიხეილ სააკაშვილის გათავისუფლების წინაპირობა, ამიტომ გაუგებარია, რატომ დადგა საერთოდ ეს საკითხი დღის წესრიგში.
„თუ ეს პარტიების ბრძოლის ტაქტიკის ნაწილია, მაშინ პრეზიდენტის ადგილას მე გავემიჯნებოდი ამას და შევეცდებოდი, რომ ძალიან ნათელი ყოფილიყო ჩემი პოზიცია. ეს ასეც არის, მისი ნათქვამი შეწყალებაზე მას არ გადაუთქვამს. როდესაც ამდენი ადამიანი მოდის, მიტინგს გიწყობს და პრეტენზიებს გიცხადებს, ამან შეიძლება ადამიანურად რაღაც გაღიზიანება გამოიწვია მასში, მაგრამ კარგად უნდა გვესმოდეს იმ ხალხის, ვინც სააკაშვილის შეწყალების წინააღმდეგია და ვინც თვლის, რომ მას ჩადენილი აქვს დანაშაული და ამისთვის უნდა მოიხადოს სასჯელი. ეს არ არის მარტივად მისაღები გადაწყვეტილება და დარწმუნებული ვარ, რომ პრეზიდენტი ამას კარგად აცნობიერებს. უბრალოდ მე არა მგონია, რომ ის ახლა მოლაპარაკებებს აწარმოებდეს პარტიებთან სააკაშვილის შეწყალებასთან დაკავშირებით. შეწყალება მისი გადასაწყვეტია, მაგრამ, ჩემი აზრით, საბოლოო ჯამში ის ანგარიშს გაუწევს იმ ხალხსაც, ვისთვისაც მისი შეწყალება ძალიან მტკივნეული იქნებოდა. დანაშაულები, რაც შერაცხული აქვს სააკაშვილს, ის არსად გამქრალა – ამ დანაშაულებს ჰყავს კონკრეტული მსხვერპლები ჰყავს“, – განაცხადა იოსელიანმა.