სამხარაულის ექსპერტიზის ბიუროს დასკვნა არ მჭირდება იმისთვის, რომ ეჭვი მეპარებოდეს „ემპათიის“ დასკვნებში – სხვა დროსაც მითქვამს, – ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.
„გავიხსენოთ ყველამ შაქარაშვილის საქმე, ბაჩალეიშვილის საქმე და გავიხსენოთ, თუ რას ამბობდა მაშინ „ემპათია“ და მისი ხელმძღვანელი. ეს იყო პირდაპირი სიყალბე, რაც მაშინ გვესმოდა ამ ორგანიზაციის მხრიდან ტელევიზიებში. არ მინდა დეტალებში ჩავიდე, მაგრამ ყველას ახსოვს, რა სიყალბესთან გვქონდა ადგილი. ამიტომ თავისთავად ამ ორგანიზაციის მიმართ ნდობა ზოგადად არ მაქვს“, – აღნიშნა პაპუაშვილმა.
იუსტიციის სამინისტრომ 2023 წლის 26 იანვარს ლევან სამხარაულის ეროვნული ბიუროსგან მიიღო დასკვნა, რაც მოიცავს სამ ძირითად მიმართულებას. ეს არის ფსიქიატრიული, გასტროენტეროლოგიური და ნევროლოგიური დიაგნოზები. იუსტიციის მინისტრ რატი ბრეგაძის განცხადებით, ლევან სამხარაულის ექსპერტიზის ეროვნული ბიუროს დასკვნის მიხედვით, სააკაშვილთან დაკავშირებით ცენტრ „ემპათიას“ დასკვნა არ არის სანდო და უტყუარი. ურთიერთსაწინააღმდეგო ორი დასკვნა სასამართლოს წარედგინება, სადაც სასჯელის გადავადების საკითხზე მსჯელობა მიმდინარეობს.