იურიდიულ საკითხთა კომიტეტში აგენტების ამერიკული კანონპროექტის განხილვა ხმაურის ფონზე მიმდინარეობს. სხდომაზე ადგილი ჰქონდა ფიზიკურ დაპირისპირებასაც.
ფიზიკური დაპირისპირება მას შემდეგ დაიწყო, რაც კომიტეტის თავმჯდომარე ანრი ოხანაშვილმა მანდატურის სამსახურს, ადგილიდან შეძახილების გამო, რამდენიმე დეპუტატის დარბაზიდან გაყვანის შესახებ მოუწოდა. ეს გიორგი ვაშაძემ კომიტეტის თავმჯდომარესთან გააპროტესტა. ლევან ხაბეიშვილი კი, ანრი ოხანაშვილს ფიზიკურად დაუპირისპირდა.
საბოლოოდ სხდომა ოპოზიციონე დეპუტატებთა ნაწილს დაატოვებინეს. როგორც „ნაციონალური მოძრაობის“ თავმჯდომარემ ლევან ხაბეიშვილმა ჟურნალისტებს განუცხადა, სხდომა მათ მანდატურებმა დაატოვებინეს. „კი არ გამოვედით, 12-მა კაცმა გამოგვიყვანა“, – განაცხადა ხაბეიშვილმა.
სხდომაზე გათვალისწინებულია „ხალხის ძალის“ მიერ ინიცირებული ორივე კანონპროექტის პირველი მოსმენით განხილვა. დეპუტატებმა სხდომის დასაწყისში პროცედურულ საკითხებზე ისაუბრეს. პარტია „საქართველოსთვის“ წევრებმა გამოთქვეს მოსაზრება, მათ მიერ ინიცირებული კანონპროექტი ალტერნატიული კანონპროექტის სახით განიხილონ.
სხდომის დაწყებამდე ოპოზიციის გარკვეულმა ნაწილმა უკვე განაცხადა, რომ სხდომას დაესწრებოდნენ, თუმცა მის განხილვას გააპროტესტებენ.
სხდომაზე ტექნიკური შესვენება რამდენჯერმე გამოცხადდა. დღეს პარლამენტში უსაფრთხოების გარკვეული წესები მუშაობს.