ჩვენი თანამშრომლები ისევ იმყოფებიან თავის საცხოვრებელ ადგილას და უსაფრთხოდ არიან. დარწმუნებით გეუბნებით, რომ „ჯეო სქაის“ თანამშრომლებს დაახლოებით, 4-5 დღის წყლისა და საკვების მარაგი აქვთ, – ამის შესახებ „ქრონიკას „ჯეო სქაის“ ვიცე-პრეზიდენტმა, შალვა კიკნაძემ განუცხადა.
„ბოლო ინფორმაცია ის გვაქვს, რომ ჩვენი თანამშრომლები ისევ იმყოფებიან თავის საცხოვრებელ ადგილას და უსაფრთხოდ არიან. დარწმუნებით გეუბნებით, რომ „ჯეო სქაის“ ჩვენს თანამშრომლებს ახლა აქვთ წყალი და საკვები დაახლოებით, მინიმუმ 4-5 დღის. ჩვენს პარტნიორ კომპანიასთან, ვისთანაც ვმუშაობთ სუდანში, კომუნიკაცია გვაქვს და ვცდილობთ, მაღაზიებიდან შეძლებისდაგვარად მივატანინოთ და ჩვენები საკვებითა და წლით უზრუნველვყოთ. პარასკევს რამადანი მთავრდება, მარხვა – მათთვის არის ძალიან დიდი დღესასწაული. იმედი მაქვს, ამ დღესასწაულზე ცეცხლის შეწყვეტაზე შეთანხმდებიან“, – განაცხადა შალვა კიკნაძემ.
საქართველოს 40-მდე მოქალაქე კვლავ სუდანში რჩება. სახელმწიფო მათი ევაკუაციისთვის, კერძო კომპანიების ჩართვით, ვითარების დასტაბილურებას ელოდება.
„ქრონიკას“ დაპირისპირების ზონაში მყოფი ქართველები პერიოდულად უკავშირდებიან. ამჟამად ამბობენ, რომ ვითარება მათთან ახლოს რთულდება. დღეს მოსალოდნელია ელექტროენერგიის გათიშვაც.
არეულობა ქვეყანაში, რამდენიმეთვიანი დაძაბულობის შემდეგ, 15 აპრილს დაიწყო. გასამხედროებულ დაჯგუფებასა და ქვეყნის არმიას შორის შეტაკებებს, ბოლო მონაცემებით, სულ მცირე 185 ადამიანი ემსხვერპლა, 1800-ზე მეტი კი დაიჭრა.