თუ არ ვცდები, „ნაციონალურ მოძრაობას“ დღეს 20 წევრი ჰყავს ფრაქციაში, ვიცე-სპიკერის არჩევისთვის საჭიროა 76 ხმა. მათ აკლიათ 56 ხმა, უნდა იზრუნონ, რომ ეს 56 ხმა მოიპოვონ, – ამის შესახებ საქართველოს პარლამენტის თავმჯდომარემ, შალვა პაპუაშვილმა ლევან ბეჟაშვილის ვიცე-სპიკერად შესაძლო არჩევის შესახებ საუბრისას განაცხადა.
მისი თქმით, რეგლამენტით და კონსტიტუციით პარლამენტის წევრს აქვს თავისუფალი მანდატი, ეს ნიშნავს, რომ ის წყვეტს კენჭისყრაზე დაყენებულ საკითხს დაუჭიროს მხარი, თუ – არა.
„თითი რომელ ღილაკს მიაჭიროს, წყვეტს მხოლოდ პარლამენტის წევრი. ვერც რეგლამენტი აიძულებს რამეს და ვერც სხვა რამე დადგენილება. ამიტომ ეს არის გადაწყვეტილება, რომელიც პარლამენტმა უნდა მიიღოს, ამ შემთხვევაში პარლამენტის უმრავლესობამ უნდა მიიღოს. ამიტომ არის, მნიშვნელოვანია, რომ კანდიდატის დამსახელებელმა ფრაქციამ სხვა ფრაქციებთან თუ პოლიტიკურ ჯგუფებთან გაიაროს კონსულტაციები. თუ არ ვცდები, „ნაციონალურ მოძრაობას“ დღეს 20 წევრი ჰყავს ფრაქციაში, ვიცე-სპიკერის არჩევისთვის საჭიროა 76 ხმა. მათ აკლიათ 56 ხმა, უნდა იზრუნონ, რომ ეს 56 ხმა მოიპოვონ. 56 ადამიანი უნდა ნახონ, სადაც უნდათ იქ ნახონ, არ ვიცი. 20 არიან, სჭირდებათ 56, რომ გახდეს ვიცე-სპიკერი, ეს უკვე პოლიტიკური ნაწილია. მათ უნდა დაარწმუნონ მინიმუმ 56 დეპუტატი, ვინც მათ ფრაქციაში არ არის, რომ მხარი დაუჭირონ. თუკი დაარწმუნებენ, არჩეული იქნება, თუ ვერ დაარწმუნებენ, ვერ იქნება არჩეული“, – აღნიშნა შალვა პაპუაშვილმა.