კანცელარიის ყოფილი უფროსისა და ექსდეპუტატის პეტრე მამრაძის განცხადებით, ის პრაქტიკულად გამორიცხავს, რომ კოალიციიდან გამოსულმა პარტიებმა – „რესპუბლიკელებმა“, „ფორუმმა“ და „თავისუფალმა დემოკრატებმა“ შეძლონ და ვინმესთან რაიმე სერიოზული კოალიციის ან რაიმე საარჩევნო ბლოკის შექმნა.
როგორც მამრაძემ გაზეთ „ალიასთან“ საუბრისას განაცხადა, საქართველოში საარჩევნო ბლოკი უპრობლემოდ იქმნება მაშინ, როცა ჩნდება ქარიზმატული ლიდერი, რომელშიც მოსახლეობა მორიგ ბელადსა და მესიას ხედავს.
„ასე იყო 1992 წელს, როცა შევარდნაძე ჩამოვიდა საქართველოში, მოსახლეობის უმეტესობაში იყო განწყობა, აწი გვეშველებაო, ასე იყო 2003 წელს, როცა მოხდა „ვარდების რევოლუცია“. მაშინ გახლდათ გამოკვეთილი ლიდერი, პოპულიზმით შეპყრობილი მიხეილ სააკაშვილი. ასე მოხდა 2012 წელს, როცა ასპარეზზე გამოჩნდა ბიძინა ივანიშვილი და სრულიად ხელმოცარული პარტიები გააერთიანა.
შევახსენოთ ხალხს, რა ხდებოდა იმ შუალედში, ვიდრე ბიძინა გამოჩნდებოდა. 26 მაისს გადატენილი იყო სტადიონი, აღტაცებულ ხალხს ზოგიერთი პოლიტიკური ლიდერი ხელში ეჭირა და ბილიკზე ატარებდა, მაგრამ იმ საღამოს მათ იმედები გაუწბილეს. რა გარიგება მოხდა ისეთი მიხეილ სააკაშვილთან, რომ ამხელა მუხტი ჩაშალეს, ამაზე ბევრი მსმენია, მაგრამ ახლა ამაზე არ ვისაუბრებ. გვახსოვს რუსთაველზე „საკნების აქცია“, სალომე ზურაბიშვილმა შეძლო და თქვა, ჩვენ მხოლოდ პოლიტიკურ სიცოცხლეს ვუხანგრძლივებდით მიშასო, მაგრამ, როგორც კი დაინახეს ბიძინა ივანიშვილი პოლიტიკური პარტიის ლიდერებმა, ეცნენ და შეეცადნენ, მის გვერდით ადგილი დაეკავებინათ. რა, თქვენ გგონიათ, მაშინ ერთმანეთი უყვარდათ „რესპუბლიკელებსა“ და ალასანიას?!. არა, გენაცვალე, მაშინაც ისევე სძულდათ ერთმანეთი, როგორც ახლა. ჩვენ ხომ გვახსოვს, რა სტანდარტი იყო და რა კრიტიკის ქარ-ცეცხლში გაატარეს „რესპუბლიკელებმა“ ალასანია, როცა ის ლავროვს შეხვდა. ჩვენ გვახსოვს სატელეფონო ჩანაწერები, რომლის ავთენტურობაც ეჭვქვეშ არ დამდგარა, ერთმანეთს დედებს რომ აგინებდნენ. რამ შეკრა ისინი?!. დიდი ფულის იმედმა. ბიძინა ივანიშვილი მათთვის იყო ერთადერთი გზა პარლამენტში მოხვედრისა, მათთვის მთავარი იყო, რამდენიმე წელი მაინც ეტივტივათ პოლიტიკურ ვერტიკალში. მათ გაუჩნდათ იმედი პოლიტიკური ცხოვრების გახანგრძლივებისა, ამის გამო დახუჭეს თვალი და ვისაც ერთმანეთი ეზიზღებოდა, ერთ კოალიციაში აღმოჩნდა.
დღეს, მე ვფიქრობ, რომ არჩევნებს მოიგებს „ქართული ოცნება“, რადგან მის ხელშია ადმინისტრაციული რესურსი. თუ გაინტერესებთ, რა ხდება საკუთრივ პარტია „ოცნებაში“, გეტყვით, რომ განწყობა – „საერთოდ არავინ გვჭირდება და კენჭი უნდა ვიყაროთ დამოუკიდებლად“, მოდის ბიძინა ივანიშვილისგან, მათთვის სხვა პარტიები აღმოჩნდა ტვირთი. სწორედ ამ განწყობამ განაპირობა ის, რომ კოალიცია დაშალა. ის, რომ „ქართული ოცნება“ აუცილებლად გაიმარჯვებს, ამის საფუძველს ადმინისტრაციული რესურსის გარდა, მაძლევს ის, რომ არც ერთი პოლიტიკური დაჯგუფება არ არის ისეთი, რომელმაც შეიძლება მასიური მხარდაჭერა მოიპოვოს და ამომრჩევლის იმ 60%-ის არჩევნებში მოყვანა შეძლოს, ვინც ყველა გამოკითხვით უარს აცხადებს, მონაწილეობა მიიღოს არჩევნებში. რეალურად კი, ამ ამომრჩევლის 60%-ის ბოიკოტი დაფიქსირდა ადგილობრივი თვითმმართველობის არჩევნების დროს. ამ ამომრჩევლის თავისკენ მოქაჩვა არც ერთს არ შეუძლია. საქართველოში პიროვნებას აძლევენ ხმას და არა _ პარტიებს. დღეს კი არ მეგულება ისეთი პიროვნება, რომელსაც შეუძლია, 60% არჩევნებზე მიიყვანოს და ეს ხმები თავის საარჩევნო ყუთში ჩააყრევინოს“ – აცხადებს მამრაძე.