უკრაინის საგარეო საქმეთა მინისტრი დმიტრო კულება აცხადებს, რომ ნატოში არ უთქვამთ, რა პირობები უნდა დააკმაყოფილოს უკრაინამ ალიანსში გასაწევრიანებლად. როგორც მან „რადიო თავისუფლებასთან“ ინტერვიუში განაცხადა, უცნობია ისიც, ვინ უნდა ჩამოაყალიბოს ეს პირობები.
„ეს არის პრობლემა. რას ნიშნავს, „როცა პირობები იქნება დაკმაყოფილებული“? რა პირობები? ვინ აყალიბებს ამ პირობებს? რაში მდგომარეობს ეს პირობები? ჩვენი პოზიცია მდგომარეობს იმაში, რომ არსებობს ყველა წინაპირობა იმისთვის, რომ უკრაინა ნატოში მიიწვიონ. ამაში ჩვენი და ჩვენი პარტნიორების პოზიციები ფუნდამენტურად განსხვავდება. ისინი თვლიან, რომ გარკვეული პირობები უნდა დაკმაყოფილდეს. ვიმუშავებთ ჩვენს პარტნიორებთან, რათა ეს პროცესი არ გაიყინოს და ჩვენ წინ წავიწიოთ“ – აცხადებს კულება.
მისივე თქმით, ყველაზე კონსერვატიულად აშშ და გერმანია იყვნენ განწყობილები, თუმცა იმის გამო, რომ ამ ქვეყნებმა უკრაინას ყველაზე დიდი დახმარება გაუწიეს, მათ მიმართ კრიტიკის გამოთქმა რთულია.