პოლონელ ექიმებთან კონტაქტი არ მქონია და არც ვიცი, ჩემკენ ხელს რატომ იშვერენ, – ამის შესახებ საქართველოს ყოფილი პრეზიდენტის, მიხეილ სააკაშვილის დედამ, გიული ალასანიამ განაცხადა, რითიც გამოეხმაურა პენიტენციური სამსახურის მიერ გუშინ გავრცელებულ ინფორმაციას.
პენიტენციურმა სამსახურმა გუშინ გაავრცელა ინფორმაცია, რომ ერთ-ერთმა პოლონელმა ექიმმა მსჯავრდებულ მიხეილ სააკაშვილისგან აღებული ნიმუში გადაახვია ქაღალდში და ცდილობდა მის მალულად გატანას ფეხსაცმლის მეშვეობით.
როგორც გიული ალასანიამ აღნიშნა, არ იცის, არსებობდა თუ არა რაიმე პროტოკოლი, რომელიც პოლონელ ექიმებს უნდა დაეცვათ. ალასანიას თქმითვე, მისთვის გაუგებარია, რა გზით უნდა მიეწოდებინა ინფორმაცია ექიმებისთვის, რადგან მათთან კონტაქტი არ ჰქონია.
„კომენტარი ალბათ გაკეთდება იმ ინტერესიდან გამომდინარე, რაც დღეს ამ ადამიანის მიმართ არის, ყოველ შემთხვევაში, დასავლეთში ძალიან დიდი ინტერესია. ალბათ, ყველაფერი გაირკვევა, ასე დამალული დიდ ხანს ვერ დარჩება, ასე მგონია და ალბათ, შემდგომ კომენტარებს მოვისმენ. იქით მხარეც ალბათ გააკეთებს თავის განმარტებას, არ ვიცი. არ ვიცი, ჩემკენ რატომ იშვერენ ხელს იმიტომ, რომ მე არცერთ დონეზე არ ვყოფილვარ მათთან კონტაქტში, ერთადერთი თანხმობას ვაძლევდი, რომ თანახმა ვარ და ძალიანაც მივესალმები. მე რა გზით უნდა მიმეწოდებინა ინფორმაცია ექიმებისთვის, მათთან კონტაქტი არცერთ დონეზე არ მქონია. მე როგორ უნდა განმემარტა, უნდა განემარტათ თვითონ იმათ, ვინც ჩამოიყვანა და ვინც იყო კონტაქტში ამ ხალხთან, მე რა შუაში ვარ“, – განაცხადა ალასანიამ.