ევროკომისიის სამეზობლოსა და გაფართოების მოლაპარაკებების გენერალური დირექტორატის გენერალურმა დირექტორმა, გერტ იან კოპმანმა ილია დარჩიაშვილთან შეხვედრა შეაფასა. მან იმ საკითხებზე ისაუბრა, რომლებიც საქართველოს საგარეო საქმეთა მინისტრთან ბრიუსელში განიხილა.
„ძალიან ნაყოფიერი შეხვედრა გვქონდა მინისტრთან. ჩემი მხრიდან იყო მკაფიო გზავნილები ევროპულ გზაზე პროგრესისკენ და ეს მნიშვნელოვანია, რადგან დიდი იმედი გვაქვს, რომ ჩვენი პარტნიორი ქვეყნები და არა მხოლოდ საქართველო, საჭიროების შემთხვევაში წინ წავლენ. განვიხილეთ რამდენიმე საკითხი, რასაც მინისტრი გაითვალისწინებს. მისი მხრიდან იყო თხოვნა, რომ გზავნილები იყოს მკაფიო და ჩვენი მხრიდანაც შევიტანოთ წვლილი, რასაც ჩვენ გავაკეთებთ. აგვისტოში ვეწვევი თბილისს და ვიმედოვნებთ, რომ პროგრესი წინა ზეპირ მოხსენებასთან შედარებით უფრო პოზიტიური იქნება, რადგან ლიდერებმა გადაწყვეტილებები დეკემბერში უნდა მიიღონ. ეს ნამდვილად დამოკიდებულია ნაბიჯებზე, რომლებიც უნდა გადაიდგას“, – განაცხადა კოპმანმა.