უკრაინის პრეზიდენტმა, ვოლოდიმირ ზელენსკიმ ბრიტანეთში ელჩი, ვადიმ პრისტაიკო თანამდებობიდან გაათავისუფლა.
ზელენსკის განკარგულება სახელმწიფოს მეთაურის ვებგვერდზე გამოქვეყნდა.
განკარგულების მიხედვით, პრისტაიკო ორი თანამდებობიდან არის გათავისუფლებული – დიდი ბრიტანეთისა და ჩრდილოეთ ირლანდიის საგანგებო და სრულუფლებიანი ელჩის, ასევე საერთაშორისო საზღვაო ორგანიზაციაში მუდმივი წარმომადგენლის თანამდებობიდან.
საქმე იმაშია, რომ 13 ივლისს დიპლომატმა უკრაინის პრეზიდენტი ბრიტანეთის თავდაცვის მინისტრის სიტყვების საპასუხოდ გაკეთებული განცხადებისთვის გააკრიტიკა.
კერძოდ, ნატოს სამიტის ფარგლებში ზელენსკი ალიანსი უკრაინასთან დაკავშირებით “გადაუწყვეტელობაში” დაადანაშაულა და თქვა, რომ “უპრეცედენტო და აბსურდულია, როდესაც არ არსებობს ვადები როგორც უკრაინის მოწვევისთვის, ასევე, წევრობისთვის; და როდესაც ემატება რაღაც უცნაური ფორმულირება “პირობებზე”, თუნდაც უკრაინის მოწვევისთვის”.
აღნიშნული განცხადების კომენტირებისას ბრიტანეთის თავდაცვის მინისტრმა, ბენ უოლესმა თქვა, რომ “უკრაინა უფრო მეტად მადლიერი უნდა იყოს დასავლეთის დახმარებისთვის”. მისი თქმით, როდესაც შარშან უკრაინაში ჩავიდა, მას მაშინვე გადაეცა საჭირო იარაღის სია,“იცით, Amazon-ი არ ვართ“, ვუთხარი მათ შარშან, მას შემდეგ, რაც 11 საათს ვიმგზავრე სიის მისაღებად”.
მეორე დღეს, ზელენსკიმ თქვა, რომ უკრაინა მადლიერია ბრიტანეთისა და მისი ხალხის მხარდაჭერისთვის.
„ვფიქრობ, ჩვენ ყოველთვის დიდი მადლიერი ვიყავით გაერთიანებული სამეფოს, ყოველთვის მადლობელი ვიყავით პრემიერმინისტრისა და თავდაცვის მინისტრის, ბატონი უოლესის… უბრალოდ არ ვიცი რას გულისხმობს, სხვაგვარად როგორ უნდა გადავუხადო მადლობა. დაე, მომწეროს… შეიძლება დილით გავიღვიძოთ და მინისტრს მადლობა პირადად გადავუხადოთ”,- თქვა უკრაინის პრეზიდენტმა.
ზელენსკის ამ სიტყვების კომენტირებისას პრისტაიკომ თქვა, რომ “უკრაინის პრეზიდენტმა არაჯანსაღი სარკაზმი გამოიყენა.
“ვფიქრობ, ზელენსკის პასუხში ცოტა სარკაზმი იყო, როდესაც მან თქვა, რომ ყოველ დილით უნდა ურეკოთ ბენ უოლესს და მადლობები უხადოთ. არ მგონია, რომ ეს ჯანსაღი სარკაზმი იყოს. ვფიქრობ, ჩვენ არ უნდა ვაჩვენოთ რუსებს, რომ ჩვენ შორის მსგავსი რამეა. მათ უნდა იცოდნენ, რომ ერთად ვმუშაობთ“, – განაცხადა ელჩმა.