ანაკლიის ახალგაზრდული ბანაკი აგრძელებს მონაწილეების მიღებას. 23 ივლისიდან 6 აგვისტოს ჩათვლით ბანაკს ორ ნაკადად იძულებით გადაადგილებული პირები სტუმრობენ. სსიპ „ახალგაზრდობის სააგენტომ“ მათ ინტერაქტიული პროგრამა მოუმზადა, რომლის ფარგლებში დანარჩენ მონაწილეებთან ერთად, იძულებით გადაადგილებული პირები ჩაერთვებიან სპორტულ ოლიმპიადაში და შეეჯიბრებიან ერთმანეთს სპორტის ხუთ სახეობაში: კალათბურთში, ფეხბურთში, ფრენბურთში, მაგიდის ჩოგბურთსა და ჭადრაკში.
რაც შეეხება საგანმანათლებლო შეხვედრებს, მათი თემატიკა მრავალფეროვანია: რიტორიკა და კომუნიკაცია; ავირჩიოთ პროფესია; მოხალისეობა და აქტიური მოქალაქეობა; ქვეყნის თავდაცვისუნარიანობა და თვითგადარჩენა; ახალგაზრდული შესაძლებლობები არაფორმალურ გარემოში. ბავშვები შეხვდებიან ცნობილ სპორტსმენებსა და ხელოვანებს, რომლებიც მათ თავის გამოცდილებაზე უამბობენ. გარდა ამისა, ბავშვები ჩაერთვებიან შემოქმედებით ღონისძიებებში, რომლებიც მათი მონაწილეობით მომზადდება. თავიანთი ინტელექტუალური შესაძლებლობების გამომჟღავნებას კი ბავშვები შეძლებენ სხვადასხვა ინტელექტუალურ თამაშებში, როგორიცაა „გემობანა“, „რა? სად? როდის?“ და სხვა.
ორგანიზატორი კულტურის, სპორტისა და ახალგაზრდობის სამინისტროს მმართველობის სფეროში მოქმედი სსიპ „ახალგაზრდობის სააგენტოა“. ღონისძიების პარტნიორი – სამხრეთ ოსეთის ადმისტრაცია. ბანაკში იმყოფებიან 14-დან 18 წლამდე ახალგაზრდები საქართველოს ყველა რეგიონიდან. მათი შერჩევა მოხდა სხვადასხვა სახელმწიფო უწყებებთან კოორდინირებით. წელს, ბანაკები მასპინძლობენ აფხაზეთიდან და ცხინვალის რეგიონიდან დევნილ ახალგაზრდებს, სოციალურად დაუცველი ოჯახის შვილებს, სახელმწიფო ზრუნვის ქვეშ მყოფ ახალგაზრდებს და სხვებს.