ბელარუსში მყოფი „ვაგნერის“ დაჯგუფების მებრძოლები პოლონეთში ექსკურსიას ითხოვენ – ამის შესახებ ბელარუსის პრეზიდენტმა რუს კოლეგას აცნობა. როგორც ალექსანდრ ლუკაშენკომ სანქტ-პეტერბურგში ვლადიმერ პუტინთან შეხვედრისას განაცხადა, „ვაგნერელებს“ პოლონეთის მიმართ შურისძიება ამოძრავებთ, რადგანაც იციან, რომ უკრაინა იარაღით პოლონეთისგან მარაგდება.
ბელარუსის ლიდერმა პუტინს ასევე აცნობა, რომ პოლონეთი ბელარუსის საზღვართან სამხედრო ძალების კონცენტრაციას ახდენს. თავის მხრივ, პუტინმა უკრაინული მხარის დიდძალ დანაკარგზე ისაუბრა და განაცხადა, რომ უკრაინის კონტრშეტევა ჩავარდა.
„ვაგნერელებმა“ ძალიან დაგვძაბეს. პოლონეთში გადასვლის უფლებას ითხოვენ. ვეკითხები, რა უნდათ პოლონეთში. მეუბნებიან, რომ ექსკურსია უნდათ ვარშავაში. ძალიან ცუდად არიან პოლონეთის მიმართ განწყობილნი, რადგანაც კარგად იციან, რომ იარაღით უკრაინას პოლონეთი ამარაგებდა. რა თქმა უნდა, ისინი კონტროლის ქვეშ მყავს, როგორც შევთანხმდით და პოლონეთში მათი დისლოცირება არ მსურს“, – განაცხადა ლუკაშენკომ..