დღეს განსაკუთრებული დღეა, რადგან ოფიციალურად იხსნება საქართველოს საელჩო ზაგრებში. ხორვატიაში დიპლომატიური მისიის გახსნა მეტყველებს არა მხოლოდ ჩვენი ორმხრივი ურთიერთობების მზარდ დინამიკაზე, არამედ მიუთითებს სამხრეთ-აღმოსავლეთ ევროპაში საქართველოს ჩართულობასა და აქტიურობაზე, – ამის შესახებ საქართველოს პრემიერ-მინისტრმა, ირაკლი ღარიბაშვილმა ზაგრებში ხორვატიის პრემიერ-მინისტრთან ერთად გამართულ ბრიფინგზე განაცხადა.
ღარიბაშვილის თქმით, ეს არის ხორვატიაში მისი პირველი ვიზიტი და მიწვევისთვის მან პრემიერ-მინისტრს ანდრეი პლენკოვიჩს მადლობა გადაუხადა.
„ჩვენ ძალიან ვაფასებთ ხორვატიასთან ურთიერთობას. ეს არის სამაგალითო სახელმწიფო საქართველოსთვის სამხრეთ-აღმოსავლეთ ევროპის რეგიონში. 30-წლიანი დამოუკიდებლობის პერიოდში ხორვატიამ საგარეო ურთიერთობის მთავარი ორიენტირები სისრულეში მოიყვანა, როდესაც ევროპული და ევროატლანტიკური ოჯახის სრულუფლებიანი წევრი გახდა. ევროკავშირში გაწევრიანების პერიოდში მან ქმედითად დაასრულა ევროკავშირში ინტეგრაციის პროცესი, როდესაც ევროზონასა და შენგენის სივრცეს მიუერთდა.
წელს საქართველო და ხორვატია დიპლომატიური ურთიერთობების დამყარებიდან 30 წლის იუბილეს აღნიშნავენ, რაც ამ ვიზიტს კიდევ უფრო დიდ მნიშვნელობას ანიჭებს. ამასთანავე, დღეს განსაკუთრებული დღეა, რადგან ოფიციალურად იხსნება საქართველოს საელჩო ზაგრებში. ხორვატიაში დიპლომატიური მისიის გახსნა მეტყველებს არა მხოლოდ ჩვენი ორმხრივი ურთიერთობების მზარდ დინამიკაზე, არამედ მიუთითებს სამხრეთ-აღმოსავლეთ ევროპაში საქართველოს ჩართულობასა და აქტიურობაზე. ეს იმას ნიშნავს, რომ ჩვენი ორმხრივი ურთიერთობები გაძლიერდება და კავშირები კიდევ უფრო გამყარდება. ჩვენ მზად ვართ გამოვიყენოთ ყველა შესაძლებლობა იმისთვის, რომ პარტნიორობა ჩვენს ქვეყნებს შორის კიდევ უფრო გავაღრმაოთ“, – განაცხადა ირაკლი ღარიბაშვილმა.