„გულწრფელად ვთქვათ, ერთი თვე უნდა იმუშაო, რომ მეგობარ გოგონასთან ან ბიჭთან ერთად წახვიდე და ყავა დალიო.. ერთ პაემანზე ან მეგობართან საჭორაოდ რომ წახვიდე, 150 ლარი არ გეყოფა,“ – ამის შესახებ ლევან ხაბეიშვილმა დმანისში, „გამარჯვების პლატფორმის“ ფარგლებში, „სტრატეგია აღმაშენებლის“ ლიდერთან, გიორგი ვაშაძესთან ერთად, ახალგაზრდებთან გამართულ შეხვედრაზე აღნიშნა.
„ნაციონალური მოძრაობის“ თავმჯდომარე ინიციატივით გამოდის, რათა 20 ათასი სტუდენტისთვის საუნივერსიტეტო ქალაქებში საცხოვრებლები აშენდეს, კარგი აკადემიური მოსწრების მქონე სტატუსშეჩერებულმა სტუდენტებმა შეძლონ სწავლის აღდგენა და ნიჭიერ სტუდენტებს საჯარო სამსახურებში მიეცეთ სტაჟირების გავლის შესაძლებლობა, 1000-1500 ლარიანი მინიმალური ანაზღაურებით.
„მთავარი, რაზედაც უნდა ვიზრუნოთ და ვიფიქროთ არის შემდეგი: 20 000 სტუდენტისთვის ჩვენ უნდა უზრუნველვყოთ საუნივერსიტეტო ქალაქებში საცხოვრებლების მშენებლობა, სადაც სტუდენტებს მოუწევთ არა 1000-1500-2000 ლარის გადახდა, არამედ შეეძლებათ ადეკვატურ ფასად იცხოვრონ და მიიღონ განათლება;
70 000 სტატუსშეჩერებულ სტუდენტს, ვისაც აქვს კარგი მოსწრება, კარგი ნიშნები, უნდა განათლების მიღება, ამ ადამიანების სწავლის გაგრძელება უპირობოდ უნდა უზრუნველვყოთ;
მნიშვნელოვანი – ყველა ნიჭიერ, განათლებულ სტუდენტს უნდა მიეცეს შესაძლებლობა, მათ შორის საჯარო სამსახურებში, სადაც თავიანთი მამიდები და ნათესავები ჰყავთ დასაქმებული, მათ ნაცვლად, ნიჭიერ სტუდენტებს უნდა შეეძლოთ სტაჟირების გავლა და ჰქონდეთ მინიმალური ანაზღაურება- 1000-დან 1500 ლარამდე,“ – განაცხადა ლევან ხაბეიშვილმა.