ბათუმის ნავსადგურში საპროტესტო აქცია მთელი ღამის განმავლობაში მიმდინარეობდა. საკრუიზო ლაინერი Astoria Grande, რომელზეც რუსეთის მოქალაქეები იმყოფებიან, ნავსადგურში დილის 06:00 საათისთვის შევიდა. მას აქციის მონაწილეები პროტესტით დახვდნენ.
ადგილზე სამართალდამცველებთან რამდენჯერმე სიტყვიერი დაპირისპირება მოხდა. სავარაუდოდ, დაკავებულია ათამდე ადამიანი.
ნავსადგურის მიმდებარედ, გოგებაშვილის ქუჩის ნაწილი გადაკეტილი აქვთ სამართალდამცველებს, მეორე ნაწილი კი – აქციის მონაწილეებს. გემის მიმდებარედ სამართალდამცველები არიან მობილიზებულნი.
საკრუიზო ლაინერიდან მგზავრები სავარაუდოდ მალე დაიწყებენ ჩამოსვლას. აქციაზე ისმის შეძახილები, სტვენა, გაშალეს სხვადასხვა ბანერი.
ადგილზე იმყოფებიან მოქალაქეები, „ნაციონალური მოძრაობისა“ და სხვა ოპოზიციური პარტიების წარმომადგენლები.
საკრუიზო ლაინერის შემოსვლის გასაპროტესტებლად, ბათუმის ნავსადგურში მოქალაქეებმა და ოპოზიციური პარტიების წარმომადგენლებმა შეკრება ღამის თორმეტი საათისთვის დაიწყეს.