ჩვენ მოვიაზრებთ, რომ საქართველოში ჩინეთიდან შეიძლება განხორციელდეს მნიშვნელოვანი ინვესტიციები ეკონომიკის სხვადასხვა დარგში, – ამის შესახებ ლევან დავითაშვილმა განაცხადა. ეკონომიკისა და მდგრადი განვითარების მინისტრმა განმარტა რა საკითხებში განიხილება თანამშრომლობა ორ ქვეყანას შორის.
„საუბარია თანამშრომლობაზე ტრანსპორტის, ლოგისტიკისა და კავშირგაბმულობის სფეროებში და აქაც საუბარია ძალიან მჭიდრო თანამშრომლობაზე, რომელიც საშუალებას მისცემს ქვეყანას, რომ განავითაროს სამი მიმართულებით თავისი პრიორიტეტები, რომლებიც უკავშირდება ქვეყნის სატრანსპორტო და ლოგისტიკურ ჰაბად გადაქცევას. ერთ-ერთი პრიორიტეტი ეს არის.
მეორე – საქართველო შეიძლება იყოს ციფრული ჰაბი და აქაც, ციფრული ეკონომიკის განვითარების კუთხით თანამშრომლობას განსაკუთრებული პერსპექტივები აქვს. ასევე აღნიშნულია თანამშრომლობა ენერგეტიკის მიმართულებით და საქართველო შეიძლება იყოს ენერგეტიკული ჰაბიც.
ყველა პოტენციალი არსებობს, რომ ჩინეთი შეიძლება იყოს საქართველოს ერთ-ერთი პირველი სავაჭრო პარტნიორი, გაიზარდოს როგორც ექსპორტი, ისე იმპორტი და სავაჭრო ურთიერთობა წახალისდეს ორივე ქვეყნიდან. ღვინის ექსპორტის თვალსაზრისითაც, ჩინეთი საქართველოსთვის ძალიან პერსპექტიულია. პერსპექტიულია ასევე [თანამშრომლობა] ავიამიმოსვლის კუთხით. აქაც საუბარი იყო იმაზე, რომ თავისუფალი ცის ფარგლებში მეტი კავშირი გვექნება ჩინეთის სხვადასხვა ქალაქთან და, შესაბამისად, ეს პირდაპირ შეუწყობს ხელს, ტურისტულ ნაკადს“, – განაცხადა დავითაშვილმა.
საქართველოს პრემიერ-მინისტრის, ირაკლი ღარიბაშვილის ვიზიტი ჩინეთის სახალხო რესპუბლიკაში 27 ივლისს დაიწყო. ირაკლი ღარიბაშვილი 28 ივლისს ჩინეთის სახალხო რესპუბლიკის პრეზიდენტს სი ძინპინს შეხვდა. საქართველო პრემიერ-მინისტრმა ირაკლი ღარიბაშვილმა და ჩინეთის სახალხო რესპუბლიკის პრეზიდენტმა სი ძინპინმა საქართველო-ჩინეთის ურთიერთობების სტრატეგიული პარტნიორობის დონემდე ამაღლების შესახებ განაცხადეს.
დღეს კი გამოქვეყნდა ჩინეთის სახალხო რესპუბლიკისა და საქართველოს ერთობლივი განცხადება სტრატეგიული პარტნიორობის დამყარების შესახებ.