მსოფლიოში ადამიანის უფლებებისა და დემოკრატიის მდგომარეობის შესახებ ევროკავშირის მიერ გამოქვეყნებული 2022 წლის ყოველწლიური ანგარიში ასევე მიმოიხილავს ადამიანის უფლებებისა და დემოკრატიის მდგომარეობას შეერთებულ შტატებში.
როგორც ანგარიშშია აღნიშნული, მიუხედავად იმისა, რომ აშშ-ის ადმინისტრაციამ ფედერალურ დონეზე შეინარჩუნა მორატორიუმი სიკვდილით დასჯაზე, ექვს შტატში (ალაბამა, არიზონა, მისისიპი, მისური, ოკლაჰომა და ტეხასი) სიკვდილით დასაჯეს 18 ადამიანი. 2022 წელს შვიდით მეტი სიკვდილით დასჯა იყო, ვიდრე 2021 წელს, უპირველეს ყოვლისა, ოკლაჰომაში ყოველთვიური სიკვდილით დასჯის დაგეგმვისა და არიზონას მიერ რვაწლიანი დე-ფაქტო მორატორიუმის მოხსნის გამო. 27 შტატში კვლავ ნარჩუნდება სიკვდილით დასჯა, ხოლო კონგრესმა არ მიიღო შეთავაზებული კანონმდებლობა სიკვდილით დასჯის გაუქმების შესახებ. აშშ-მა არ დაუჭირა მხარი გაეროს გენერალური ასამბლეის რეზოლუციას „მორატორიუმი სიკვდილით დასჯის გამოყენების შესახებ“.
ევროკავშირის ანგარიში აშშ-ში აბორტებთან დაკავშირებულ რეგულაციებსაც ეხება. აღნიშნულია, რომ 2022 წლის ივნისში აშშ-ის უზენაესმა სასამართლომ გააუქმა აბორტის კონსტიტუციური უფლება. წლის ბოლომდე, 13 შტატმა მთლიანად აკრძალა აბორტი და სამოქალაქო საზოგადოების ჯგუფები თვლიან, რომ სულ მცირე 26 შტატი საბოლოოდ აკრძალავს აბორტს ან დააწესებს სერიოზულ შეზღუდვებს.
ევროკავშირის შეფასება აშშ-ში ლგბტ უფლებების საკითხსაც მოიცავს. დოკუმენტში ვკითხულობთ, რომ მიუხედავად იმისა, რომ კონგრესმა მიიღო ერთნაირსქესიანთა ქორწინების პატივისცემის აქტი, 13 შტატმა მოაწერა ხელი ლგბტ-ს საწინააღმდეგო კანონპროექტებს, მათ შორის კანონებს, რომლებიც კრძალავს ტრანსგენდერი ახალგაზრდების სამედიცინო მომსახურებას და ზღუდავს სკოლებში ლგბტ უფლებების განხილვას მოსწავლეებთან.
ევროკავშირი ასევე ამახვილებს ყურადღებას აშშ-ში 35 პატიმრის ბედზე. ეს ის ადამიანები არიან, რომლებიც 2023 წელს HRW-ის ანგარიშში მოხვდნენ, როგორც პატიმრები, რომლებიც სასჯელს იხდიან ბრალის წაყენებისა და სასამართლო პროცესის გარეშე და რომელთა უმეტესობაც ციხეში 20 წელზე მეტი ხნის განმავლობაში იმყოფება.