“ყველას უნდა გვახსოვდეს, რომ სამყაროში ყველაფერს ბუმერანგის ეფექტი აქვს და რასაც გავცემთ, უკან გვიბრუნდება”

თბილისის მერიის მედიასთან ურთიერთობის სამსახურის უფროსი მანანა თოქმაჯიშვილი სოციალურ ქსელში პოსტს აქვეყნებს.

“ნუთუ ამხელა ტრაგედიის დროს მაინც არ შეგვიძლია დავრჩეთ ადამიანებად? დედები შვილებს ელიან, დარდისგან მოკუნტული მამები, ბებიები, ბაბუები ტკივილს ვეღარ უძლებენ და ამ დროს ფეიკ ინფორმაციამ და ტყუილებმა წალეკა სოცქსელები.

სიტყვას უდიდესი ძალა აქვს. დღეს ის მკვლელობის იარაღია ბოროტი, უსულგულო ადამიანების ხელში.

ასევე, არ მინდოდა შევხებოდი კახის ოჯახის თემას, ბევრი მიზეზის გამო, მაგრამ ისეთების პოსტებს და კომენტარებს წავაწყდი, მართლა არ ვიცი როგორ გავაგრძელო ურთიერთობები ხვალ.

რა ლოგიკით შეიძლება სერიოზულად განიხილოს საღ ჭკუაზე მყოფმა ადამიანმა ის ვერსიები, რაც მოვისმინეთ თუ წავიკითხეთ? ანუ კახის შვილები სტიქიის დროს მართლა იქ რომ ყოფილიყვნენ, სამაშველო ვერტმფრენში არ უნდა ჩაესვათ და დაეტოვებინათ ადგილზე? ან კიდევ, რას ნიშნავს ეჭვები, თითქოს კახიმ წინასწარ იცოდა სტიქია დაატყდებოდა თავს შოვს და მხოლოდ საკუთარი შვილები გაიყვანა ბოლო წუთებში? ანუ, ადამიანი, რომლის ოჯახმა კარგად იცის რა არის შვილის დაკარგვის ტკივილი, დაელოდა ბოლო წუთებს ბავშვების რისკის ზონიდან გასაყვანად და სხვისი შვილები იქ დატოვა?

ხალხო, ამას მართლა სერიოზულად კითხულობთ?

აღარაფერს ვამბობ იმ საშინელ წყევლაზე, რასაც გაუგებარი წარმონაქმნები (ადამიანებს მათ ვერ ვუწოდებ) ვირუსულად ავრცელებენ.

ვიცი, არანაირი აზრი არა აქვს არც თხოვნას, არც მოწოდებას, მაგრამ ყველას უნდა გვახსოვდეს, რომ სამყაროში ყველაფერს ბუმერანგის ეფექტი აქვს და რასაც გავცემთ, უკან გვიბრუნდება.”