პირველ რიგში, მინდა კიდევ ერთხელ მივუსამძიმრო შოვში დატრიალებული უმძიმესი ტრაგედიის შედეგად გარდაცვლილთა ოჯახებსა და ახლობლებს. დღეს გლოვის დღეა და მართლაც, საქართველოში არ მეგულება ადამიანი, რომელმაც ბოლომდე გულთან არ მიიტანა, პიროვნულ ტრაგედიად არ აღიქვა ძალიან დიდი მასშტაბის ბუნებრივი კატასტროფა, რომელმაც ადამიანების სიცოცხლე იმსხვერპლა, – ამის შესახებ დედაქალაქის მერმა კახა კალაძემ თბილისის მთავრობის სხდომაზე განაცხადა.
მთავრობის სხდომის წევრებმა წუთიერი დუმილით გარდაცვლილთა ხსოვნას პატივი მივაგეს.
„ასეთ დროს ყველას სოლიდარობა და ერთმანეთის გამხნევება, გვმართებს.
არ ვიცი ნუგეშის რა სიტყვები არსებობს ასეთ დროს, მაგრამ ყველაზე უიმედო მდგომარეობაშიც კი იმედს გვაძლევს ისეთი ისტორიები, როგორსაც მაგალითაც ჰყვებიან სტიქიის შედეგად გარდაცვლილ გიორგი გოგინაშვილზე, რომელიც სამშვიდობოს გამოსული უკან სხვების დასახმარებლად შებრუნდა.
მადლობა ჩვენს გმირ მაშველებს, პოლიციელებს, ჯარისკაცებს, მოხალისეებს, „წითელი ჯვრის“ წარმომადგენლებს სამედიცინო ბრიგადებს, რეგიონული განვითარებისა და ინფრასტრუქტურის სამინისტროს წარმომადგენლებს იმ არნახული ძალისხმევისთვის, რასაც ისინი ეწევიან სტიქიის ზონაში.
მინდა, კიდევ ერთხელ დავაფიქსირო პირადად ჩემი და თბილისის მერიის მზაობა, გვერდით დავუდგეთ ცენტრალურ ხელისუფლებასა და ონის მუნიციპალიტეტის მერიას. მზად ვართ, ჩვენს ხელთ არსებული ყველა რესურსით, იქნება ეს ტექნიკური თუ ადამიანური, შოვში დატრიალებული კატასტროფით გამოწველი შედეგების წინააღმდეგ ბრძოლაში ჩავერთოთ.
რაც შეეხება ჭორს ჩემი ოჯახის შესახებ თითქოს მე ჩემი ოჯახი ვერტმფრენით გამოვიყვანე შოვიდან.
ამ საკითხზე მე მომმართა ტელეკომპანია „იმედმა“, მიმეცა ნებართვა სათვალთვალო კამერების ჩანაწერები მოეპოვებინათ, რომელიც შოვიდან ჩემი ოჯახის გამოყვანას ასახავს. საზოგადოებამ სიმართლე თავად იხილა, და ნახა რისი მკადრებელია ზოგიერთი მედიასაშუალება, პოლიტიკოსი, თუ პოლიტიკური აქტივისტი.
როგორც უკვე აღვნიშნე დღეს გლოვის დღეა და საზოგადოებას, ისევე როგორც საკუთარ თავს არ ვაკადრებ, რომ ამ ხალხზე მეტი ვისაუბრო და ის ვთქვა რასაც მართლა იმსახურებენ.
ახლა საჭიროა ერთად დგომა, ერთმანეთის გამხნევება, გარდაცვლილების ოჯახებისა და ახლობლებისთვის შეძლებისდაგვარად ტკივილის შემსუბუქება.
ყველას უნდა ვუჩვენოთ, რომ ასეთი უმძიმესი ტრაგედიის დროს მაინც შეგვიძლია გვერდით გადავდოთ ყველაფერი.
ზუსტად ვიცი, ქართველებს შეგვწევს უნარი ერთმანეთს ზიზღის ნაცვლად სიკეთე გავუზიაროთ, გაუტანლობის ნაცვლად ერთმანეთის გვერდში დგომის მაგალითები ვუჩვენოთ.
ღმერთმა დალოცოს ჩვენი ქვეყანა და ჩვენი შვილები!“ – განაცხადა კახა კალაძემ.