„ქართული ოცნების“ თავმჯდომარემ, ირაკლი კობახიძემ და აღმასრულებელმა მდივანმა, მამუკა მდინარაძემ, მუხათგვერდის ძმათა სასაფლაოზე აგვისტოს ომში დაღუპული გმირების ხსოვნას პატივი მიაგეს.
მმართველი პარტიის ლიდერები მუხათგვერდის ძმათა სასაფლაოზე ახალგაზრდული ორგანიზაციის წევრებთან ერთად იმყოფებოდნენ.
„2008 წლის აგვისტოს დღეები სიამაყით გვავსებს იმ გმირების თავგანწირვის გამო, რომლებმაც თავი შესწირეს ჩვენს ქვეყანას. ჩვენმა ჯარისკაცებმა აჩვენეს ქართველი კაცის, ქართველი ჯარისკაცის გმირული სული. მადლობა მათ ამისთვის. დიდი იმედი მაქვს, რომ მალე ახდება ის ოცნება, რომელსაც ამ ადამიანებმა თავი შესწირეს. იმედი მაქვს, რომ ძალიან მალე ჩვენი ქვეყანა გამთლიანდება, გაერთიანდება. ეს იყო მათი ოცნება, ღმერთმა ნათელში ამყოფოს ჩვენი გმირების სულები“, – აცხადებს ირაკლი კობახიძე.
„ჩვენ დღეს ვართ იმ ადგილას, სადაც ყველაზე მძაფრად გვახსენდება ჩვენი გმირები, ვის მაგალითზე უნდა ვასწავლოთ შვილებს ცხოვრება – გმირობის მაგალითზე, სამშობლოს სიყვარულის მაგალითზე. განსაკუთრებული ემოციაა იმ ადამიანებთან შეხვედრა, რომლებმაც აგვისტოს ომში შვილი დაკარგეს. მინდა კიდევ ერთხელ პატივი მივაგო ჩვენ გმირებს. ყველა ქართველს, ყოველთვის უნდა ახსოვდეს, რომ მათ მაგალითზე უნდა გაიზარდოს ყველა ქართული ოჯახის შვილი“, – აცხადებს მამუკა მდინარაძე.
