საგარეო ურთიერთობათა კომიტეტის თავმჯდომარის პირველი მოადგილე, არაბთა გაერთიანებული საამიროების პარლამენტთან მეგობრობის ჯგუფის წევრი მარიამ ლაშხი არაბთა გაერთიანებული საამიროების ელჩს აჰმედ იბრაჰიმ აჰმედ თაჰერ ალ ნუაიმის შეხვდა, – ამის შესახებ ინფორმაციას პარლამენტის პრესსამსახური ავრცელებს.
მათივე ცნობით, შეხვედრაზე მხარეებმა ორ ქვეყანას შორის არსებული ურთიერთობები მიმოიხილეს. როგორც შეხვედრაზე აღინიშნა, საქართველოს და არაბთა გაერთიანებულ საამიროებს ტურიზმის და საინვესტიციო მიმართულებებით გარკვეული თანამშრომლობა აკავშირებს, თუმცა არსებობს კიდევ უფრო მეტი პოტენციალი, რაც ეკონომიკურ ურთიერთობებს კიდევ უფრო მეტად შეუწყობს ხელს.
„აღნიშნულ თემებზე საუბრისას მხარეებმა ორ ქვეყანას შორის თავისუფალი ვაჭრობის შეთანხმებაზე წარმოებული მოლაპარაკებების მნიშვნელობაზე ისაუბრეს. აღინიშნა, რომ მოლაპარაკებების პროცესი უპრეცედენტოდ მოკლე პერიოდში, ექვს თვეში დასრულდა, რაც ორი ქვეყნის საერთო ინტერესზე მიუთითებს.
მხარეებმა შემოდგომაზე დაგეგმილ ეკონომიკურ ფორუმსა და აბრეშუმის გზის კონფერენციაზე საპარლამენტო დელეგაციების მონაწილეობის მნიშვნელობას გაუსვეს ხაზი. აღინიშნა, რომ საერთაშორისო დონის ეკონომიკურ ღონისძიებებზე, მთავრობის და ბიზნეს სექტორის წარმომადგენლებთან ერთად, პარლამენტის წევრების მონაწილეობა ფორუმებზე განსახილველ თემებს კიდევ უფრო საინტერესოს გახდის.
ელჩმა ქართველ დეპუტატს მისი ქვეყნის პარლამენტის თავმჯდომარის სახელით საქართველოს პარლამენტის თავმჯდომარის საამიროებში მიწვევის ინფორმაცია გააცნო და აღნიშნა, რომ პარლამენტის თავმჯდომარეების შეხვედრა ორი ქვეყნის საკანონმდებლო ორგანოებს შორის თანამშრომლობის გაღრმავებას კიდევ უფრო შეუწყობს ხელს.
აღინიშნა, რომ ქვეყნებს შორის საპარლამენტო ორგანოს მეგობრობის ჯგუფებმა ონლაინ რეჟიმში დისტანციური შეხვედრები უკვე გამართეს და ამჟამად ორმხრივი შეხვედრების გამართვასთან დაკავშირებით, სამუშაო პროცესი მიმდინარეობს“, – აღნიშნულია გავრცელებულ ინფორმაციაში.