რუსული ეკონომიკა ნელნელა ადაპტირდება საერთაშორისო სანქციების მიმართ და მომავალ წელს შეიძლება ომამდელ დონეს დაუბრუნდეს. ამის შესახებ გამოცემა Bloomberg-ი წერს, თუმცა აქვე აღნიშნავს, რომ კრემლის სურვილმა, წვევამდელების რაოდენობა გაზარდოს, შესაძლოა ეკონომიკის აღდგენას ხელი შეუშალოს.
კერძოდ, რამდენიმე დღის წინ რუსეთის პრემიერმა, მიხაილ მიშუსტინმა განაცხადა, რომ 2023 წლის მეორე კვარტალში რუსეთის ეკონომიკა 4,6%-ით გაიზარდა, ხოლო 2023 წლის პირველ ნახევარში – 1,5%-ით.
ამასთანავე, Bloomberg-ი აღნიშნავს, რომ სამუშაო ძალის დეფიციტი, რომელიც წვევამდელთა რიცხვის გაზრდის გამო შეიძლება შეიქმნას, ეკონომიკაზე უარყოფითად აისახება. როგორც Bloomberg-ი წერს, ამის გამო შესაძლოა სამხედრო კომისარიატებმა ისეთი ადამიანების გაწვევა დაიწყონ, რომელთა არყოფნა სამუშაო ადგილზე ნაკლებ პრობლემას შექმნის.
გასულ კვირაში პუტინმა ხელი მოაწერა ბრძანებას, რომლის მიხედვითაც ჯარში გაწვევის ზედა ასაკობრივი ზღვარი 30 წლამდე გაიზარდა. რუსეთის მშპ-ს შესახებ არსებული ბოლო მონაცემების მიხედვით, ბოლო ოთხი კვარტლის განმავლობაში რუსეთის ეკონომიკა იზრდებოდა, მიუხედავად იმისა, რომ სანქციების დაწესების შემდეგ რუსეთის ეკონომიკას ხანგრძლივ ვარდნას უწინასწარმეტყველებდნენ.