გამოძიების ფედერალური ბიუროს (FBI) ყოფილმა მაღალჩინოსანმა რუსეთის წინააღმდეგ სასანქციო რეჟიმის დარღვევაში ბრალი აღიარა. ინფორმაციას ამის შესახებ ამერიკული მედია ავრცელებს.
ჩარლზ მაკგონიგალი, რომელიც პასუხისმგებელი იყო FBI-ის ნიუ-იორკის ოფისში კონტრდაზვერვაზე, რუსეთის წინააღმდეგ აშშ-ის სანქციების დარღვევის გამო დააკავეს. კერძოდ, ოლეგ დერიპასკასთან, სანქცირებულ რუს ოლიგარქთან მუშაობის გამო. გამოძიების განცხადებით, FBI-ის ყოფილი მაღალჩინოსანი დერიპასკასგან ფულს იღებდა კონკურენტი რუსი ოლიგარქის, ვლადიმირ პოტანინის მიმართ გამოძიების ჩატარების სანაცვლოდ.
მაკგონიგალმა ფედერალურ სასამართლოში განაცხადა, რომ დათანხმდა პოტანინის შესახებ ინფორმაციის შეგროვებაზე, რათა ის შემდეგ სასანქციო სიაში მოხვედრილიყო.
„ვიცოდი, რომ რასაც ვაკეთებდი, არასწორი იყო“, – განაცხადა FBI-ის ყოფილმა მაღალჩინოსანმა.
მუხლი, რომელზეც მაკგონიგალმა ბრალი აღიარა, 5 წლამდე პატიმრობას ითვალისწინებს. განაჩენი 14 დეკემბერს გამოცხადდება.