რუსეთის მიერ ქალაქ ჩერნიგოვის დაბომბვის შედეგად დაიღუპა შვიდი და დაშავდა 90 ადამიანი. შესაბამის ინფორმაციას უკრაინული მედია შინაგან საქმეთა მინისტრ იგორ ლიმენკოზე დაყრდნობით ავრცელებს. დაშავებულთა შორის 12 ბავშვია.
ადგილობრივი ხელისუფლების ცნობით, ჩერნიგოვის ცენტრზე დარტყმა სავარაუდოდ ბალისტიკური რაკეტით განხორციელდა. დაზიანებულია ქალაქის დრამატული თეატრი.
„შაბათის ჩვეულებრივი დღე, რომელიც რუსეთმა ტკივილისა და დანაკარგის დღედ აქცია. არიან დაღუპულები და დაშავებულები. ჩემი სამძიმარი ყველას, ვინც ახლობლები დაკარგა“, – ასე გამოეხმაურა დარტყმას სოციალურ ქსელში უკრაინის პრეზიდენტი ვოლოდიმირ ზელენსკი, რომელიც დღეს შვედეთში გაემგზავრა.
უკრაინული მედიის ცნობით, დარტყმის დროს ჩერნიგოვის ცენტრში მდებარე დრამატულ თეატრში დრონების მწარმოებლებისა და აეროდაზვერვის სკოლების წარმომადგენელთა შეხვედრა იმართებოდა.