ასე ხდება წლების განმავლობაში, რომ თუკი გარკვეული მიზეზების გამო იმ წუთიერად საკრებულოს დარბაზში არ ვიმყოფებით, ჩვენი პოზიციის დაფიქსირება სამდივნოსთანაა შესაძლებელი, – ამის შესახებ თბილისის საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარემ, ლევან ჟორჟოლიანმა „ქრონიკაში“ ჩართვისას განაცხადა.
მან გუშინ საკრებულოს სხდომაზე, კენჭისყრის პროცედურასთან დაკავშირებით განმარტება გააკეთა. მისი თქმით, გუშინ საკრებულოს სხდომაზე მათ 81 საკითხი განიხილეს. იყო მომენტი, როდესაც იგი ობიექტური მიზეზის გამო დარბაზში არ იმყოფებოდა.
„ობიექტური მიზეზებიდან გამომდინარე, შესაძლოა, არ ვიყოთ სხდომის დარბაზში. ამას ჩვენი ოპონენტებიც ძალიან ხშირად იყენებენ და პრაქტიკაში გვაქვს დანერგილი, რომ თუკი რაიმე საკითხის კენჭისყრის დროს დარბაზში ფიზიკურად არ იმყოფები, მაგრამ დარეგისტრირებული ხარ და შენობაში იმყოფები, ამ შემთხვევაში შეგიძლია მიხვიდე სამდივნოსთან და დააფიქსირო შენი აზრი. სხვათა შორის, გუშინ ჩვენმა ერთ-ერთმა კოლეგამ ოპოზიციიდან ეს მექანიზმი გამოიყენა და თქვა, რომ ჟურნალისტებს ესაუბრებოდა, ინტერვიუს აძლევდა და ამა და ამ საკითხებზე მისი პოზიცია რაც იყო.
ჩემი მხრიდანაც სწორედ იგივე მოხდა. ასე ხდება წლების განმავლობაში, რომ თუკი გარკვეული მიზეზების გამო იმ წუთიერად დარბაზში არ ვიმყოფებით, ჩვენი პოზიციის დაფიქსირება სამდივნოსთანაა შესაძლებელი. შეგვიძლია დავაფიქსიროთ დადებითია, უარყოფითი ჩვენი პოზიცია თუ თავს ვიკავებთ. კიდევ ერთხელ ხაზს ვუსვამ, ეს წინა სხდომაზეც გამოიყენეს ჩვენმა კოლეგებმა“, – განაცხადა ჟორჟოლიანმა.