ფუკუშიმას ბირთვული სადგურიდან გაფილტრული რადიოაქტიური წყლის ოკეანეში ჩაღვრის დაწყების შემდეგ ტოკიოს ენერგო კომპანიამ სადგურზე პირველი მედია ტური მოაწყო. ადგილობრივ და საერთაშორისო მედიის წარმომადგენლებს პროცესის მიმდინარეობა და უსაფრთხოების ზომების დაცვის ხარისხი გააცნეს.
ფუკუშიმას ბირთვული სადგურიდან გაფილტრული რადიოაქტიური წყლის ოკეანეში ჩაღვრა 24 აგვისტოდან დაიწყო. საუბარია ბირთვული რეაქტორის გასაგრილებლად გამოყენებულ მილიონ ტონა წყალზე. ეს პროცესი ათობით წლის განმავლობაში გაგრძელდება
იაპონიის ხელისუფლებაში აცხადებენ, რომ პროცესი გარემოსთვის უსაფრთხოა. მათი განმარტებით, ოკეანეში გადაღვრილი წყალი არა მხოლოდ გაწმენდილი, არამედ გაზავებულიც იქნება, რათა რადიაციის დონე დასალევი წყლისთვის დაწესებულ ნორმაზე დაბალი იყოს. წყალში დარჩენილი ტრიტიუმის დონე კი იაპონიაში მოქმედი უსაფრთხოების ნორმებით გათვალისწინებულ მაჩვენებელზე 40-ჯერ დაბალი იქნება.
ატომური ენერგიის საერთაშორისო სააგენტომ გეგმას მწვანე შუქი რამდენიმე კვირის წინ აუნთო. სააგენტოს დასკვნის მიუხედავად, რეგიონში მცხოვრები მეთევზეები შიშობენ, რომ რადიოაქტიური წყლის ჩაღვრას მათ საქმიანობაზე ნეგატიური გავლენა ექნება.