მას შემდეგ, რაც ცხელ ხაზზე დაფიქსირდა შეტყობინებები, გამგეობის წარმომადგენლები აბსოლუტურად ყველა მისამართზე იყვნენ მისულები, – ამის შესახებ გლდანის რაიონის გამგებლის მოვალოების შემსრულებელმა ბესიკ კალაძემ განაცხადა.
„ძირითადი ლოკაცია იყო მეტროს მიმდებარე ტერიტორია, ე.წ. მიწისქვეშა გადასასვლელები, სადაც მოხდა კონკრეტულ ნაწილში დატბორვა. დავეხმარეთ მოსახლეობას, რომ გამოსულიყვნენ გარე ტერიტორიაზე. უზრუნველყავით, რომ პირველ ეტაპზე გათიშულიყო ელექტროენერგია, რათა საფრთხე არ ყოფილიყო. მას შემდეგ, რაც ცხელ ხაზზე დაფიქსირდა შეტყობინებები, გამგეობის წარმომადგენლები აბსოლუტურად ყველა მისამართზე იყვნენ მისულები. დილის 06:00 საათამდე გაგრძელდა ეს პროცესი.
რაც შეეხება დაზარალებულ ოჯახებს, გვყავს ერთი ოჯახი, რომელთაც დაენგრათ კედელი, იმავე წუთს გადავიყვანეთ სასტუმროში და შემდეგ დავგეგმავთ, თუ რა ღონისძიებებს გავატარებთ ამ ოჯახთან მიმართებით“, – განაცხადა ბესიკ კალაძემ.
ძლიერმა ნალექმა და ქარმა დედაქალაქში გუშინ პრობლემები შექმნა. დაიტბორა ქუჩები, მიწისქვეშა გადასასვლელები, წაიქცა ხეები, დაზიანდა ელექტროსადენები, წყალმა კორპუსების სარდაფებშიც შეაღწია.
თბილისის მუნიციპალიტეტის ყველა შესაბამისი უწყება, შინაგან საქმეთა სამინისტროს საგანგებო სიტუაციების მართვის სამსახურთან ერთად, სრულად იყო მობილიზებული.
თბილისის მერი კახა კალაძე დედაქალაქში ძლიერი წვიმით გამოწვეულ შედეგებს ადგილზე გაეცნო. შესაბამისი სამსახურები პრობლემურ ადგილებზე მთელი ღამის განმავლობაში მუშაობდნენ.