აშშ-ის სახელმწიფო დეპარტამენტი ღრმა შეშფოთებას გამოთქვამს მთიან ყარაბაღში ჰუმანიტარული პირობების გაუარესების გამო.
„ღრმად შეშფოთებულნი ვართ მთიან ყარაბაღში ჰუმანიტარული პირობების გაუარესების გამო, რაც გამოწვეულია საკვების, მედიკამენტებისა და სხვა საქონლის მუდმივი ბლოკირებით. ბოლო რამდენიმე კვირის განმავლობაში, აშშ უწყვეტად მუშაობდა მხარეებთან, რათა დაეშვათ ჰუმანიტარული დახმარების მიწოდება მთიანი ყარაბაღის მოსახლეობისთვის“, – ნათქვამია განცხადებაში.
განცხადებაში ასევე აღნიშნულია, რომ დაუყოვნებლივ უნდა გაიხსნას ლაჩინის დერეფანი ჰუმანიტარული, კომერციული და სამგზავრო გადაზიდვებისთვის.
„გარდა ამისა, ბაქოს ოფიციალური პირები და სტეფანაკერტის წარმომადგენლები უნდა შეიკრიბონ დაუყოვნებლივ, რათა შეთანხმდნენ მთიანი ყარაბაღის კაცების, ქალებისა და ბავშვებისთვის კრიტიკული მნიშვნელობის პროდუქტების ტრანსპორტირების საშუალებებზე, მათ შორის მიწოდების დამატებით მარშრუტებზე და განაახლონ დისკუსია ყველა გადაუჭრელ საკითხზე. საბაზისო ჰუმანიტარული დახმარება არასოდეს უნდა იყოს პოლიტიკური უთანხმოების მძევალი“, – განაცხადეს სახელმწიფო დეპარტამენტში.