ადამიანი, რომელიც წავა კანონმდებლობის, კანონის უზენაესობის წინააღმდეგ მიუხედავად მისი თანამდებობრივი მდგომარეობისა, ყველა შემთხვევაში ამაზე შესაბამისი რეაგირება იქნება. სწორედ ამიტომ მიიღო მმართველმა გუნდა გადაწყვეტილება [იმპიჩმენტის თაობაზე], – ამის შესახებ პარლამენტის განათლებისა და მეცნიერების კომიტეტის თავმჯდომარემ, გივი მიქანაძემ განაცხადა.
„50-ზე მეტი ხელმოწერა იქნება და შესაბამისი განაცხადი გაიგზავნება საკონსტიტუციო სასამართლოში. ჩვენ დარწმუნებულები ვართ, რომ ის მოქმედება, რომელიც განახორციელა პრეზიდენტმა არის კონსტიტუციის უხეში დარღვევა და მითუმეტეს მიუღებელია იმ ადამიანისგან, რომელმაც პრეზიდენტად არჩევის დროს კონსტიტუციაზე დაიფიცა და მის მიერ წარმოთქმულ ფიცში ერთ-ერთი უმნიშვნელოვანესი ფაქტორი არის, რომ ის არის გარანტი და დამცველი კონსტიტუციის. ვნახავთ ასევე ვინ – რა პოზიციას დაიკავებს, ვინ იქნება კანონის უზენაესობის მხარეს და ვინ მიიღებს პოლიტიკურ სუბიექტურ გადაწყვეტილებას“, – განაცხადა მიქანაძემ.
მმართველი პარტია საქართველოს პრეზიდენტის იმპიჩმენტის პროცედურებს ხვალიდან დაიწყებს. უმრავლესობის სხდომაზე ქართული ოცნება 50 ხელმოწერას შეაგროვებს და საკონსტიტუციო სასამართლოს მიმართავს. სასამართლომ უნდა დაადგინოს, დაარღვია თუ არა საქართველოს კონსტიტუცია ქვეყნის პრეზიდენტმა. ამის შემდეგ საკითხი საკანონმდებლო ორგანოს გადაეცემა. იმისათვის რომ იმპიჩმენტი შედგეს, დეპუტატების 100 ხმა არის საჭირო.
საქართველოს პრეზიდენტის მიმართ იმპიჩმენტის პროცედურის დაწყების თაობაზე „ქართული ოცნების“ თავმჯდომარემ და საპარლამენტო უმრავლესობის ლიდერმა, ირაკლი კობახიძემ 1-ელ სექტემბერს, პარტიის ოფისში გამართულ ბრიფინგზე განაცხადა.