სომხეთის უსაფრთხოების სფეროში რუსეთზე დამოკიდებულება სტრატეგიული შეცდომა იყო. ამის შესახებ, როგორც Armeniatoday-ზე დაყრდნობით La Repubblica იუწყება, სომხეთის პრემიერ-მინისტრმა ნიკოლ ფაშინიანმა განაცხადა.
„სომხეთის უსაფრთხოების არქიტექტურა 99,999%-ით იყო დაკავშირებული რუსეთთან, მათ შორის იარაღისა და საბრძოლო მასალის შეძენის არეალში. მაგრამ დღეს, როცა რუსეთს იარაღი და საბრძოლო მასალა სჭირდება, ცხადია, რომ რომც უნდოდეს, რუსეთის ფედერაცია ვერ უზრუნველყოფს სომხეთის უსაფრთხოების გარანტიას“, – განაცხადა მან.
ფაშინიანის თქმით, ამ მაგალითმა უნდა აჩვენოს, რომ უსაფრთხოების სფეროში, ერთ ცენტრზე დამოკიდებულება ან მიჯაჭვულობა თავისთავად სტრატეგიული შეცდომაა.
„და მხოლოდ მას შემდეგ, რაც ამ შეცდომის მწარე ნაყოფი ვიგემეთ, ჩვენ ვაკეთებთ ძალიან ბუნდოვან მცდელობებს ჩვენი უსაფრთხოების პოლიტიკის დივერსიფიკაციისთვის“, – აღნიშნა სომხეთის პრემიერმა.