სამწუხაროდ, კახეთში სეტყვა მოვიდა, მაგრამ ამის მიუხედავად, მინდა მკაფიოდ განვაცხადო და დავამშვიდო ჩვენი ძვირფასი მოქალაქეები, რომ არც ერთი კილოგრამი დაზიანებული თუ დასეტყვილი ყურძენი არ დარჩება ჩაუბარებელი, – ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის სხდომის დაწყებისას განაცხადა.
მისივე თქმით, სახელმწიფო 1 კგ ყურძენს 90 თეთრად ჩაიბარებს.
პრემიერმა სხდომის დაწყებამდე აღნიშნულ სფეროში დღეს არსებულ და წინა ხელისუფლების დროს არსებულ ვითარებაზე ისაუბრა.
„რამდენიმე კონკრეტული შედეგი მინდა შევახსენო ჩვენს საზოგადოებას და მათ შორის, ჩვენს კრიტიკოსებს, თუ სად ვიყავით 10 წლის წინ. მაშინ ქვეყანაში მეღვინეობის 40-მდე კომპანია არსებობდა, დღეს არის 2500 კომპანია. ვენახების ფართობები მთლიანად დაახლოებით, 25 ათას ჰექტარს შეადგენდა, ბოლო 10 წელიწადში ვენახების ფართობები გაორმაგდა. 50 ათასი ჰექტარი ვენახი არის გაშენებული ჯამურად ქვეყანაში.
ასევე მინდა ვთქვა, რომ შარშან 270 მლნ ლარი მიიღეს კახეთში მევენახეებმა შემოსავლის სახით. შედარებისთვის თუ ამას ავიღებთ, 2012 წელს შემოსავალი იყო მაქსიმუმ 35-40 მლნ ლარი. ჯამში, 10 წელიწადში 2 მილიარდ ლარზე მეტი მიიღეს შემოსავლის სახით კახეთის მევენახეებმა და ფერმერებმა. ეს რა თქმა უნდა, ძალიან დიდი სხვაობაა. ჩვენ პერიოდში ჯამურად მიიღეს 2 მილიარდი მევენახეებმა და მანამდე, წინა ხელისუფლების დროს შეიძლება ჯამურად, 200 მილიონზე მეტი ლარი არ ყოფილიყო 10 წელიწადში შემოსავალი. ჩანს რომ 10-ჯერ მეტი სხვაობაა ჩვენს დროს და ეს შემთხვევით არ მომხდარა. ეს არის სწორად დაგეგმილი გააზრებული პოლიტიკა, დახმარებები, სუბსიდია, უამრავი, პროგრამა, რომელიც დღემდე მუშაობს.
ასევე მინდა, საზოგადოებას შევახსენო, რომ აუცილებელია, აგროდაზღვევის პროგრამაში ჩართულობა. ჩვენ შარშან თუ არ ვცდები, გვქონდა 50%-იანი თანადაფინანსება, ჩვენ ეს გავზარდეთ 70%-მდე.
ასევე, შარშან რეკორდული რაოდენობის ღვინო გაიყიდა. 103 მილიონი ლიტრი ღვინო გაიყიდა შარშან. აქედან ასეულობით მილიონი დოლარის შემოსავალი შემოდის ქვეყანაში და ჩვენს მოქალაქეებს, რა თქმა უნდა, საშუალება ეძლევათ მეტი განვითარების, მეტი გამდიდრების და ა.შ. შედარებისთვის მინდა აღვნიშნო, 10 წლის წინ, დაახლოებით, 20-30 მილიონი ლიტრი ღვინო იყიდებოდა.
ეს არის რეალობა. ჩვენ ამ პოლიტიკას შევინარჩუნებთ გავაძლიერებთ, კიდევ ურო მეტ დახმარებას გამოვუყოფთ ჩვენს მევენახეებს, ფერმერებს. მინდოდა კიდევ ერთხელ მეთქვა ჩვენი მევენახეებისთვის, რომ სანერვიულო მათ არაფერი აქვთ. სახელმწიფო ჩაიბარებს 90 თეთრად დასეტყვილ და დაზიანებულ ყურძენს. ასე რომ ყველაფერი იქნება ძალიან კარგად“, – განაცხადა ღარიბაშვილმა.