“შავი ზღვის მარცვლეულის ინიციატივა უნდა აღდგეს, თუმცა არა რუსეთის ახირების ხარჯზე”

უკრაინის საგარეო საქმეთა მინისტრმა, დმიტრო კულებამ განაცხადა, რომ შავი ზღვის მარცვლეულის ინიციატივა უნდა აღდგეს, თუმცა არა რუსეთის ახირების ხარჯზე.

უკრაინის საგარეო უწყების ხელმძღვანელის თქმით, მიუხედავად იმისა, რომ სოჭში პუტინსა და ერდოღანს შორის მოლაპარაკებები უკრაინის გარეშე მიმდინარეობდა, „ეს არ ნიშნავს, რომ ისინი უკრაინის გარეშე საუბრობენ“.

მისი თქმით, თურქეთის საგარეო საქმეთა მინისტრი, ჰაკან ფიდანი ცოტა ხნის წინ კიევს ეწვია, ხოლო შემდეგ კი მოსკოვში გაემგზავრა, ამიტომ უკრაინას ესმის დისკუსიის ზოგადი ლოგიკა.

„შავი ზღვის მარცვლეულის ინიციატივა უნდა აღდგეს. ის არ უნდა აღდგეს შანტაჟის ხარჯზე, რუსეთის ახირების შესრულების ხარჯზე, ვინაიდან არ არსებობდა რუსების შეთანხმებიდან გასვლის სამართლებრივი და პოლიტიკური საფუძველი. თუ დათმობებზე წავალთ, ახლა დაბრუნდებიან, ხოლო ერთ თვეში ახალ პირობებს წამოაყენებენ, ეს უბრალოდ კლასიკური შანტაჟია“, – განაცხადა დმიტრო კულებამ.